പ്രശസ്ത മലയാള സിനിമാ നിർമ്മാതാവും നടൻ ജീവയുടെ പിതാവുമായ ആർ.ബി. ചൗധരി രാജസ്ഥാനിലെ ഉദയ്പൂരിൽ ഉണ്ടായ കാറപകടത്തിൽ ഗുരുതരമായി പരിക്കേറ്റതിനെത്തുടർന്ന് അന്തരിച്ചു. 2026 മെയ് 6-ന് രാവിലെ 8:32-ന് അദ്ദേഹം മരണമടഞ്ഞു. ചികിത്സയിലിരിക്കെയായിരുന്നു മരണം. മൃതദേഹം അടുത്ത ദിവസം ചെന്നൈയിലേക്ക് കൊണ്ടുവരുമെന്ന് അറിയിച്ചിട്ടുണ്ട്. അപകടത്തിന്റെ വിശദാംശങ്ങൾ ഇപ്പോഴും അജ്ഞാതമാണ്.
1988-ൽ 'സൂപ്പർ ഗുഡ് ഫിലിംസ്' എന്ന നിര്മാണ കമ്പനി സ്ഥാപിച്ച ചൗധരി ദക്ഷിണേന്ത്യൻ സിനിമാ രംഗത്ത് തന്റേതായ മുദ്ര പതിപ്പിച്ച വ്യക്തിയായിരുന്നു. 1990-ൽ പുറത്തിറങ്ങിയ 'പുതുവസന്തം' ആണ് അദ്ദേഹത്തിന്റെ ആദ്യ തമിഴ് ചിത്രം. ഈ ചിത്രം മികച്ച ചിത്രത്തിനുള്ള തമിഴ്നാട് സംസ്ഥാന ചലച്ചിത്ര അവാർഡ് നേടി. കെ.എസ്. രവികുമാർ സംവിധാനം ചെയ്ത 'പുരിയാദ പുതിര്' അദ്ദേഹത്തെ സിനിമാലോകത്ത് ശ്രദ്ധേയനാക്കി. തമിഴ്, തെലുങ്ക്, മലയാളം ഭാഷകളിലായി നിരവധി സൂപ്പർഹിറ്റുകൾ അദ്ദേഹം നിർമ്മിച്ചു. ഏഴ് തവണ തമിഴ്നാട് സർക്കാരിന്റെ ചലച്ചിത്ര പുരസ്കാരങ്ങൾ അദ്ദേഹത്തെ തേടിയെത്തി.
'കീര്ത്തി ചക്ര' ഉൾപ്പെടെയുള്ള മലയാള സിനിമകളുടെ നിർമ്മാതാവായ ചൗധരി, ഫഹദ് ഫാസിലും വടിവേലുവും ഒന്നിച്ച 'മാരീസൻ' (2025) എന്ന ചിത്രത്തിന്റെ നിർമ്മാണത്തിലായിരുന്നു. 'സൂര്യവംശം', 'തുള്ളാത മനവും തുള്ളും', 'ആനന്ദം', 'ജില്ല', 'ഗോഡ്ഫാദർ' തുടങ്ങിയ ചിത്രങ്ങൾ അദ്ദേഹത്തിന്റെ ശ്രദ്ധേയമായ സൃഷ്ടികളാണ്. ഒട്ടേറെ പുതുമുഖ താരങ്ങളെയും സംവിധായകരെയും സിനിമാ രംഗത്തെ പരിചയപ്പെടുത്തിയ അദ്ദേഹം, പ്രശസ്ത നടന്മാരായ ജീവ, ജിത്തൻ രമേശ് എന്നിവരുടെ പിതാവുമായിരുന്നു. 'തിത്തിക്കുദേ', 'കീര്ത്തി ചക്ര', 'ഇ', 'കച്ചേരി ആരംഭം', 'രൗത്തരം' തുടങ്ങിയ സൂപ്പർ ഗുഡ് ഫിലിംസ് ചിത്രങ്ങളിൽ ജീവ നായകനായി അഭിനയിച്ചു. ജിത്തൻ രമേശ് നായകനായ 'പിള്ളയാര് തെരു കടൈസി വീട്' എന്ന ചിത്രവും ചൗധരിയുടെ നിർമ്മാണത്തിലായിരുന്നു.
മലയാള സിനിമാ രംഗത്ത് പ്രമുഖരായവർ ചൗധരിയുടെ മരണത്തിൽ അനുശോചനമറിയിച്ചു. നടൻ പൃഥിരാജ് അടക്കമുള്ളവർ അദ്ദേഹത്തിന്റെ വേര്പാടിനെക്കുറിച്ച് പ്രകടിപ്പിച്ചു. ചലച്ചിത്ര നിർമ്മാതാവ് ലിസ്റ്റിൻ കുറിച്ചത് ഇങ്ങനെയാണ്: "പ്രണാമം... Heartfelt condolences. എന്റെ ഏറ്റവും പ്രിയപ്പെട്ട ചൗധരി സാർ... എന്നെ ഈ ലോകത്ത് ഏറ്റവും അധികം വിശ്വസിച്ച വ്യക്തി. ഞാനൊരു വലിയ Businessman ആകണമെന്ന് ആത്മാർത്ഥമായി ആഗ്രഹിച്ച വ്യക്തി. ഇന്ന് ഞാന് ഈ നിലയില് എത്താന് കാരണക്കാരനായ വ്യക്തി. എന്റെ സന്തോഷങ്ങളും, സങ്കടങ്ങളും ആദ്യം പങ്കുവയ്ക്കുന്ന വ്യക്തി. എനിക്ക് എത്ര വലിയ പ്രശ്നങ്ങള് വന്നാലും സാരമില്ല, ഉനക്ക് ഞാനിരിക്കും എന്ന് പറയുന്ന എന്റെ എല്ലാമെല്ലാം... My dear and dearest ചൗധരി സാർ!!".
Photo and News Source: Malayali Life
