ബംഗാളിലെ നിയമസഭാ തിരഞ്ഞെടുപ്പിൽ തൃണമൂൽ കോൺഗ്രസിന് കനത്ത പരാജയമുണ്ടായതിന് ശേഷം മുൻ ഇന്ത്യൻ ക്രിക്കറ്റ് താരം മനോജ് തിവാരി പാർട്ടി വിട്ടു. ബംഗാളിലെ കായിക വകുപ്പ് സഹമന്ത്രിയായിരുന്ന തിവാരി, കായിക മന്ത്രി അരൂപ് ബിശ്വാസിനെതിരെ കടുത്ത ആരോപണങ്ങൾ ഉന്നയിച്ചാണ് പാർട്ടി വിട്ടത്. സംസ്ഥാനത്തെ കായിക മേഖലയെ അരൂപ് ബിശ്വാസ് തകർത്തുവെന്നും, കായികരംഗത്തെ അടിസ്ഥാന കാര്യങ്ങൾ പോലും അദ്ദേഹത്തിന് അറിയില്ലെന്നും തിവാരി ആരോപിച്ചു.
ബിജെപി അധികാരത്തിൽ വരുന്നതിന് തൊട്ടുപിന്നാലെയാണ് തിവാരി പാർട്ടി വിട്ടത്. തൃണമൂലിന്റെ പരാജയത്തിന് ശേഷം സംഭവിച്ച ഈ നീക്കം, പാർട്ടിക്ക് കൂടുതൽ പ്രതിസന്ധി സൃഷ്ടിച്ചേക്കാം. തിവാരി പറഞ്ഞു, "കായിക നയം കൊണ്ടുവരാൻ ഞാൻ പലതവണ ആവശ്യപ്പെട്ടെങ്കിലും അരൂപ് ബിശ്വാസ് അത് ഗൗനിച്ചില്ല. പല ഔദ്യോഗിക പരിപാടികളിലും ഒരു സ്പോർട്സ് മിനിസ്റ്റർ എന്ന നിലയിൽ എന്നെ വേദിയിൽ കയറ്റാതെ അവഗണിച്ചു."
തൃണമൂലിന്റെ പരാജയത്തിന് പിന്നിലെ കാരണങ്ങളിലൊന്നായി കായിക മേഖലയിലെ അവഗണനയെ തിവാരി ചൂണ്ടിക്കാട്ടി. ലിയോണൽ മെസ്സിയുടെ കൊൽക്കത്ത സന്ദർശനവുമായി ബന്ധപ്പെട്ട് അദ്ദേഹം ആഞ്ഞടിച്ചു. രാഷ്ട്രീയക്കാരും ഉദ്യോഗസ്ഥരും മെസ്സിക്കൊപ്പം തിക്കും തിരക്കും കൂട്ടിയപ്പോൾ സാധാരണ ആരാധകർക്ക് അദ്ദേഹത്തെ കാണാൻ പോലും സാധിച്ചില്ല. സാൾട്ട് ലേക്ക് സ്റ്റേഡിയത്തിലുണ്ടായ പ്രതിഷേധം സർക്കാരിന് നാണക്കേടായിരുന്നു. ആ പരിപാടി ഒരു 'റോയൽ മെസ്സ്' ആകുമെന്ന് തനിക്ക് അറിയാമായിരുന്നുവെന്നും അതുകൊണ്ടാണ് താൻ അതിൽ നിന്ന് വിട്ടുനിന്നതെന്നും തിവാരി വെളിപ്പെടുത്തി.
തൃണമൂലിൽ നിന്നും രാജിവെച്ചെങ്കിലും മറ്റൊരു രാഷ്ട്രീയ പാർട്ടിയിലേക്കും ചേരാൻ താൻ ആഗ്രഹിക്കുന്നില്ലെന്ന് മനോജ് തിവാരി വ്യക്തമാക്കി. ഇനി രാഷ്ട്രീയത്തിനില്ല. ക്രിക്കറ്റ് കോച്ചിംഗിൽ ശ്രദ്ധ കേന്ദ്രീകരിക്കാനാണ് തീരുമാനമെന്നും അദ്ദേഹം പറഞ്ഞു. ബംഗാൾ ചരിത്രത്തിൽ ആദ്യമായി ബിജെപി ഭരണത്തിലേറുന്ന സാഹചര്യത്തിൽ, പ്രമുഖ നേതാക്കളുടെ ഈ കൊഴിഞ്ഞുപോക്ക് തൃണമൂൽ കോൺഗ്രസിനെ കൂടുതൽ പ്രതിസന്ധിയിലാക്കിയിരിക്കുകയാണ്.
Photo and News Source: Asianet News
