അടിമാലി: രാജ്യത്ത് പാചകവാതകത്തിന്റെ അഭാവം രൂക്ഷമായിരിക്കുന്ന സാഹചര്യത്തിൽ, വാണിജ്യ സിലിണ്ടറുകളുടെ വില 993 രൂപ വർധിപ്പിച്ചത് ചെറുകിട കച്ചവടക്കാരെ തളർത്തുന്നു. 19 കിലോ വാണിജ്യ എൽപിജി സിലിണ്ടറിന്റെ വില ഇപ്പോൾ 3150 രൂപയായി ഉയർന്നു. ഹൈറേഞ്ച് മേഖലയിലെ തട്ടുകടകളിലും ഹോട്ടലുകളിലും വിഭവങ്ങളുടെ വിതരണം നിർത്തിയിട്ട് ആഴ്ചകൾ പിന്നിട്ടു. ചൂട് പാനീയങ്ങൾ പോലും ലഭ്യമല്ലാത്ത അവസ്ഥയിലാണ് കടക്കാർ.
ഹോട്ടലുകളുടെയും കടകളുടെയും നടത്തിപ്പ് ചെലവ് കുത്തനെ ഉയർന്നത് ചെറുകിട വ്യാപാരികളെ കടക്കെണിയിലാക്കി. രാജ്യത്തെ എൽപിജി ആവശ്യത്തിന്റെ 60 ശതമാനം ഇറക്കുമതിയെ ആശ്രയിച്ചിരിക്കുന്നു. പശ്ചിമേഷ്യൻ യുദ്ധത്തിന് മുമ്പ് ഇന്ത്യയുടെ ഇന്ധന ഇറക്കുമതി പ്രധാനമായും സൗദി അറേബ്യ, യുഎഇ എന്നിവിടങ്ങളിൽ നിന്നായിരുന്നു. എന്നാൽ, കേന്ദ്രസർക്കാർ ആറ് മാസത്തെ ഉപയോഗത്തിനുള്ള വാതകം പോലും സംഭരിക്കാൻ നടപടിയെടുക്കാത്തത് വിമർശനത്തിന് ഇടയാക്കുന്നു. നോമ്പ് കാലം കഴിഞ്ഞ് വിപണി പച്ചപിടിക്കേണ്ട ഘട്ടത്തിലാണ് കേറ്ററിംഗ് മേഖലയുടെയും സ്ഥിതി തകർച്ചയിലേക്ക് നീങ്ങുന്നത്.
Photo and News Source: Kvartha
