കൊച്ചി: മലയാളം ടെലിവിഷൻ രംഗത്തെ പ്രിയപ്പെട്ട നടനായ സിദ്ധാർത്ഥ് വേണുഗോപാൽ അന്തരിച്ചു. നീണ്ട രണ്ടുവർഷത്തെ രോഗപോരാട്ടത്തിനുശേഷമായിരുന്നു അന്ത്യം. ‘കസ്തൂരിമാൻ’, ‘ഭാഗ്യജാതകം’ തുടങ്ങിയ ജനപ്രിയ പരമ്പരകളിലൂടെ പ്രേക്ഷകഹൃദയം കീഴടക്കിയ നടനായിരുന്നു അദ്ദേഹം.
രോഗബാധിതനായിരുന്ന സിദ്ധാർത്ഥിന് താങ്ങും തണലുമായി നിന്ന നടി സീമ ജി. നായർ, സങ്കടകരമായ ഈ വാർത്ത ലോകത്തെ അറിയിച്ചു. സിദ്ധാർത്ഥിന്റെ വിയോഗത്തിൽ മിനിസ്ക്രീൻ ലോകം ഒന്നടങ്കം അനുശോചനം രേഖപ്പെടുത്തി. സീമ ജി. നായർ പങ്കുവെച്ച വൈകാരിക കുറിപ്പ് ആരാധകരെ കണ്ണീരിലാഴ്ത്തി. ‘പ്രതീക്ഷകൾ അസ്തമിച്ചു. നിന്റെ ജീവൻ തിരിച്ചുപിടിക്കാനായി കഴിഞ്ഞ രണ്ടുവർഷം ഞാൻ ഓടിക്കൊണ്ടേയിരുന്നു. നീ കൂടുതൽ വേദനിക്കരുതെന്ന് ഇന്ന് ഈശ്വരൻ തീരുമാനിച്ചു,’ എന്ന് അവർ കുറിച്ചു.
സീമയുടെ കരുതലിനെ കലാലോകം നന്ദിയോടെ സ്മരിക്കുന്നു. സഹപ്രവർത്തകൻ കിഷോർ സത്യയും ആദരാഞ്ജലികൾ അർപ്പിച്ചു. ‘മറ്റൊരു കലാകാരൻ കൂടി അകാലത്തില് വിടവാങ്ങി. സീമ ജി. നായരുടെ കരുതലിന് മുന്നിൽ ശിരസ്സ് നമിക്കുന്നു,’ എന്നദ്ദേഹം പറഞ്ഞു. തിരിച്ചുവരുമെന്ന പ്രതീക്ഷയിലായിരുന്നു മലയാളി പ്രേക്ഷകരുടെ പ്രിയപ്പെട്ട നടൻ യാത്രയായത്. ടെലിവിഷൻ മേഖലയ്ക്ക് വലിയൊരു നഷ്ടമാണ് സിദ്ധാർത്ഥിന്റെ അപ്രതീക്ഷിത വിയോഗം.
Photo and News Source: Janam TV
