ചെന്നൈ: എക്സിറ്റ് പോളുകളിൽ വിജയ് നേതൃത്വം നൽകുന്ന ടിവികെയ്ക്ക് മികച്ച മുന്നേറ്റം പ്രവചിച്ചതോടെ തമിഴ്നാട്ടിൽ രാഷ്ട്രീയ നീക്കങ്ങൾ ത്വരിതമാകുന്നു. പ്രതിപക്ഷമായ എഐഎഡിഎംകെ, ടിവികെയുമായി ചർച്ച നടത്താനുള്ള സാധ്യത പരിശോധിച്ചുവരികയാണ്. തിരഞ്ഞെടുപ്പ് ഫലം പുറത്തുവന്നാൽ, നേടുന്ന സീറ്റുകളുടെ എണ്ണമനുസരിച്ച് ചർച്ചകൾ പുരോഗമിക്കുമെന്നാണ് റിപ്പോർട്ടുകൾ.
വ്യാഴാഴ്ച ചെന്നൈയിലെ പാർട്ടി ആസ്ഥാനത്ത് വിളിച്ചുചേർത്ത യോഗത്തിൽ ടിവികെയുടെ സ്ഥാനാർഥികൾ പങ്കെടുത്തു. ഓരോ മണ്ഡലങ്ങളുടെയും ബൂത്ത് തലങ്ങളിലെ റിപ്പോർട്ടുകൾ ചർച്ചചെയ്യുകയും, തിരഞ്ഞെടുപ്പിന് ശേഷമുള്ള നിലപാടുകൾ ആലോചിക്കുകയും ചെയ്തു. എക്സിറ്റ് പോളുകളിൽ ടിവികെയ്ക്ക് 98 മുതൽ 120 സീറ്റുവരെ നേടുമെന്ന 'ആക്സിസ് മൈ ഇന്ത്യ'യുടെ പ്രവചനം ശ്രദ്ധേയമാണ്. 118 സീറ്റാണ് ഭരണം നേടാനാവശ്യമായ കേവല ഭൂരിപക്ഷം. ഡിഎംകെ നയിക്കുന്ന ഇന്ത്യാ സഖ്യത്തിന് 92 സീറ്റുവരെ ലഭിക്കുമെന്നാണ് പ്രവചനം. തിരഞ്ഞെടുപ്പ് ഫലം പുറത്തുവന്നാൽ, രാഷ്ട്രീയ നീക്കങ്ങൾ കൂടുതൽ സജീവമാകുമെന്ന് വിശ്വസിക്കപ്പെടുന്നു.
Photo and News Source: Mathrubhumi
