അമേരിക്ക-ഇറാൻ സംഘർഷം അവസാനിക്കുമെന്ന പ്രതീക്ഷയും ക്രൂഡ് ഓയിലിന്റെ വില 95 ഡോളറിന് താഴെ ഇറങ്ങിയതും ഇന്ത്യൻ ഓഹരി വിപണിയെ ഇന്ന് നേട്ടത്തിലാക്കി. സെൻസെക്സ് 619 പോയിന്റ് ഉയർന്നു തുടങ്ങിയെങ്കിലും പിന്നീട് നേട്ടം 300 പോയിന്റായി കുറഞ്ഞു. നിഫ്റ്റി 24,390 ലെവലിൽ വ്യാപാരം ആരംഭിച്ചു. രൂപ ഡോളറിനെതിരെ 9 പൈസ ഉയർന്ന് 93.28-ൽ സ്ഥിരപ്പെടുത്തി.
യുദ്ധവിരാമ പ്രതീക്ഷ രൂപയ്ക്ക് ബലം നൽകിയെങ്കിലും, ഇറക്കുമതിക്കാരുടെ ഡോളർ ആവശ്യവും വിദേശ വായ്പകളുള്ള കമ്പനികളുടെ ഇടപെടലും രൂപയുടെ വലിയ മുന്നേറ്റത്തിന് തടസമുണ്ടാക്കി. ബജാജ് ഫിനാൻസ്, അദാനി എന്റർപ്രൈസസ്, ഇൻഫോസിസ്, എൽ&ടി എന്നിവ നിഫ്റ്റിയിലെ പ്രധാന നേട്ടക്കാർ. ഐഷർ മോട്ടോഴ്സ്, ഭാരതി എയർടെൽ, എം&എം, ബജാജ് ഓട്ടോ, എച്ച്.സി.എൽ. ടെക്നോളജീസ് എന്നിവ നഷ്ടത്തിലായി.
ബാങ്ക്, ഐടി, മെറ്റൽ സൂചികകൾ 0.5 മുതൽ 1 ശതമാനം വരെ ഉയർന്നു. പൊതുമേഖലാ ബാങ്ക് സൂചികകളും സ്ഥിരതയുള്ള മുന്നേറ്റം കാഴ്ചവെച്ചു. എങ്കിലും, എഫ്എംസിജി, റിയൽ എസ്റ്റേറ്റ്, മിഡ്കാപ് വിഭാഗങ്ങൾ പിന്നോട്ടായി. എച്ച്ഡിഎഫ്സി ഫിനാൻഷ്യൽ സർവീസസിന്റെ ലാഭം 41 ശതമാനം ഉയർന്നതിനെ തുടർന്ന് ഓഹരി വില 12 ശതമാനം വർദ്ധിച്ചു.
Photo and News Source: Dhanam
