കേരളത്തിന്റെ നാളികേര മേഖല ഗുരുതര പ്രതിസന്ധിയിലാണ്. സംസ്ഥാനത്ത് 7.65 ലക്ഷം ഹെക്ടറിൽ തെങ്ങ് കൃഷി ചെയ്യുന്നുണ്ടെങ്കിലും, ഹെക്ടറിലെ ഉൽപ്പാദനക്ഷമത വെറും 7,211 നാളികേരം മാത്രമാണ്. ദേശീയ ശരാശരിയേക്കാൾ താഴെയുള്ള ഈ സ്ഥിതി, കർണാടക, തമിഴ്നാട്, ആന്ധ്രാപ്രദേശ് എന്നിവയെ അപേക്ഷിച്ച് കേരളത്തെ പിന്നിലാക്കുന്നു.
ശാസ്ത്രീയ കൃഷി പരിപാലന രീതികളുടെ അഭാവവും പ്രായമേറിയ തെങ്ങുകളുടെ ആധിക്യവുമാണ് പ്രധാന കാരണം. സംസ്ഥാനത്തെ 38 ശതമാനം തെങ്ങിൻ തോപ്പുകളും ഉൽപ്പാദനക്ഷമത കുറഞ്ഞ പ്രായമേറിയ തെങ്ങുകളാൽ നിറഞ്ഞിരിക്കുന്നു. 'കാറ്റുവീഴ്ച' (Root Wilt) രോഗവും വെള്ളീച്ച, കൊമ്പൻ ചെല്ലി എന്നിവയുടെ ആക്രമണവും വിളവിനെ സാരമായി ബാധിക്കുന്നു.
കാലാവസ്ഥാ വ്യതിയാനവും മണ്ണിന്റെ ഗുണനിലവാര തകർച്ചയും പ്രതിസന്ധി രൂക്ഷമാക്കുന്നു. രോഗം ബാധിച്ച തെങ്ങുകൾ മുറിച്ചുമാറ്റി പുതിയവ വയ്ക്കുന്നതിലെ കാലതാമസവും ചെലവും കർഷകരെ പിന്നോട്ടടിക്കുന്നു. തൊഴിലാളി ക്ഷാമവും ഉയർന്ന കൂലിയും മേഖലയിലെ പ്രതിസന്ധി വർദ്ധിപ്പിക്കുന്നു. കഴിഞ്ഞ പത്ത് വർഷത്തിനിടയിൽ തെങ്ങുകയറ്റ തൊഴിലാളികളുടെ കൂലി 80 ശതമാനം വരെ വർദ്ധിച്ചു. നിലവിൽ ഒരു തെങ്ങുകയറ്റക്കാരന്റെ പ്രതിദിന വരുമാനം 1,400 മുതൽ 2,000 രൂപ വരെയാണ്.
Photo and News Source: Dhanam
