ഇറാനെതിരെയുള്ള അമേരിക്കൻ ഉപരോധം എണ്ണ വ്യവസായത്തെ കടുത്ത പ്രതിസന്ധിയിലാക്കിയിരിക്കുന്നു. ക്രൂഡ് ഓയിലിന്റെ കയറ്റുമതി തടയപ്പെടുകയാൽ, ഉത്പാദിപ്പിക്കുന്ന എണ്ണ സംഭരിക്കാൻ പുതിയ മാർഗങ്ങൾ തേടുകയാണ് ഇറാൻ. രാജ്യത്തിന്റെ 90 ശതമാനത്തിലധികം എണ്ണ ഉത്പാദനം കൈകാര്യം ചെയ്യുന്ന ഖാർഗ് ദ്വീപിലെ സംഭരണശാലകൾ നിറഞ്ഞുകിടക്കുന്നു. ഈ സാഹചര്യത്തിൽ, 30 വർഷം പഴക്കമുള്ള 'നാഷ' എന്ന പഴയ എണ്ണക്കപ്പലിനെ വീണ്ടും ഉപയോഗപ്പെടുത്തുകയാണ് ഇറാൻ.
പഴയ ടാങ്കർ കപ്പലുകളിലാണ് നിലവിൽ എണ്ണ സംഭരിക്കുന്നതെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഇത്തരത്തിൽ 13 ദശലക്ഷം ബാരൽ എണ്ണ സംഭരിക്കാനാകുമെന്നാണ് കണക്കുകൾ. എന്നാൽ ഇറാൻ ദിവസം ഉത്പാദിപ്പിക്കുന്നത് 1 ദശലക്ഷം ബാരൽ എണ്ണയാണ്. അതിനാൽ 13 ദിവസത്തിനുള്ളിൽ 'നാഷ'-യുടെ സംഭരണ ശേഷി നിറയും എന്നാണ് വിദഗ്ധരുടെ അഭിപ്രായം. ഇറാന്റെ എണ്ണ മേഖലയെ അമേരിക്കൻ ഉപരോധം എങ്ങനെ ബാധിക്കുന്നുവെന്ന് വ്യക്തമാക്കുന്ന സംഭവമാണിത്.
Photo and News Source: Asianet News
