കേരളത്തിലെ ഇടുക്കി നെടുങ്കണ്ടം പച്ചടിയിൽ നടന്ന വീട്ടു കൊലപാതകം സംശയിക്കുന്നു. മേരിക്കുട്ടി (70) ഉം മകൻ റെജി (48) ഉം രണ്ടുമാസമായി കാണാതായിരുന്നു. ഇവരുടെ വീട്ടുവളപ്പിൽ കുഴിച്ചിട്ട നിലയിലാണ് അവരുടെ മൃതദേഹഭാഗങ്ങൾ കണ്ടെത്തിയത്. അഴുകിയ നിലയിലായിരുന്ന മൃതദേഹങ്ങൾ പോസ്റ്റ്മോർട്ടിനായി ഇടുക്കി മെഡിക്കൽ കോളജിലേക്ക് മാറ്റും.
മേരിക്കുട്ടിയുടെ ഇളയ മകൻ സജിയെ വീട്ടിൽ നിന്നും കാണാനില്ല. സജി തന്നെയാണ് അമ്മയെയും ജ്യേഷ്ഠനെയും കൊലപ്പെടുത്തി കുഴിച്ചിട്ടതെന്നാണ് പോലീസിന്റെ സംശയം. സജി ഇരുവരേയും കൊന്നു കുഴിച്ചിട്ടശേഷം മുങ്ങിയതാകാമെന്നാണ് പോലീസ് പ്രാഥമിക നിഗമനം. സജിയെ കണ്ടെത്താനുള്ള അന്വേഷണം നെടുങ്കണ്ടം പോലീസ് ഊർജ്ജിതമാക്കി.
വീട്ടിൽ മേരിക്കുട്ടിയും മക്കളായ റെജിയും സജിയും താമസിച്ചിരുന്നു. ഇവരുടെ ഇടയിൽ പതിവായി വഴക്കുണ്ടായിരുന്നതായി പോലീസിന് വിവരം ലഭിച്ചു. വഴക്കിനൊടുവിൽ സജി അമ്മയേയും ജ്യേഷ്ഠനേയും കൊലപ്പെടുത്തിയെന്നാണ് പോലീസിന്റെ സംശയം. മേരിക്കുട്ടിയെയും റെജിയേയും കാണാതായതില് സജി പരസ്പരവിരുദ്ധമായ കാര്യങ്ങളാണ് പറഞ്ഞിരുന്നതെന്ന് നാട്ടുകാർ വെളിപ്പെടുത്തുന്നു.
Photo and News Source: Samakalika Malayalam
