വേനൽക്കാലത്ത് വൈദ്യുതി ഉപയോഗം വർദ്ധിക്കുമ്പോൾ കെഎസ്ഇബി ബില്ലുകളിൽ നിന്നും രക്ഷനേടാൻ സോളാർ പാനലുകൾ ഒരു നല്ല പരിഹാരമാണ്. എന്നാൽ ഇവ സ്ഥാപിക്കുന്നതിന് മുൻപ് ചില പ്രധാന കാര്യങ്ങൾ ശ്രദ്ധിക്കേണ്ടതുണ്ട്.
നിങ്ങളുടെ വീട്ടിലെ ശരാശരി വൈദ്യുതി ഉപയോഗം മനസ്സിലാക്കുക. കഴിഞ്ഞ ഒരു വർഷത്തെ ബില്ലുകൾ പരിശോധിച്ച് പ്രതിമാസം എത്ര യൂണിറ്റ് ഉപയോഗിക്കുന്നുണ്ടെന്ന് കണക്കാക്കുക. ഇതിനെ അടിസ്ഥാനമാക്കി എത്ര കിലോവാട്ട് (kW) പ്ലാന്റ് വേണമെന്ന് തീരുമാനിക്കാം.
സോളാർ പാനലുകൾ ഓൺ-ഗ്രിഡ് അല്ലെങ്കിൽ ഓഫ്-ഗ്രിഡ് എന്ന രീതിയിൽ സ്ഥാപിക്കാം. ഓൺ-ഗ്രിഡ് സംവിധാനത്തിൽ പകൽ ഉത്പാദിപ്പിക്കുന്ന വൈദ്യുതി ഉപയോഗിക്കാം, ബാക്കി ഗ്രിഡിലേക്ക് നൽകാം. രാത്രി ഗ്രിഡിൽ നിന്ന് വൈദ്യുതി എടുക്കാം. ഓഫ്-ഗ്രിഡ് സംവിധാനത്തിൽ ബാറ്ററി ഉണ്ടായിരിക്കും, ഇത് വൈദ്യുതി തടസ്സമുള്ള പ്രദേശങ്ങൾക്ക് അനുയോജ്യമാണ്. എന്നാൽ ഇതിന്റെ ചിലവ് കൂടുതലാണ്.
വിപണിയിൽ മോണോക്രിസ്റ്റലൈൻ, പോളിക്രിസ്റ്റലൈൻ എന്നീ രണ്ട് തരം പാനലുകൾ ലഭ്യമാണ്. മോണോക്രിസ്റ്റലൈൻ പാനലുകൾ കടുത്ത വെയിലില്ലാത്ത സമയത്തും മേഘാവൃതമായ അന്തരീക്ഷത്തിലും മികച്ച രീതിയിൽ പ്രവർത്തിക്കും. പോളിക്രിസ്റ്റലൈൻ പാനലുകൾക്ക് വില കുറവാണെങ്കിലും കുറഞ്ഞ വെളിച്ചത്തിൽ കാര്യക്ഷമത കുറവായിരിക്കും.
Photo and News Source: Kairali News
