മുംബൈ പോലീസ് ലോക്കപ്പുകളിൽ പ്രതികൾ ആത്മഹത്യ ചെയ്യുന്നത് തടയാൻ പുതിയ ഡ്രസ് കോഡുമായി മുന്നോട്ട് വന്നിരിക്കുന്നു. ലോക്കപ്പുകളിൽ ഷർട്ടും പാന്റും ധരിക്കാൻ അനുവദിക്കാതെ ഹാഫ് സ്ലീവ് ടീഷർട്ടും ഷോർട്ട്സും മാത്രം നൽകുന്ന പുതിയ നിയമമാണ് നടപ്പിലാക്കുന്നത്. ഈ നടപടിയിലൂടെ പ്രതികളുടെ സുരക്ഷ ഉറപ്പാക്കാനും കസ്റ്റഡി മരണനിരക്ക് കുറയ്ക്കാനുമാണ് പോലീസ് ലക്ഷ്യമിടുന്നത്. മുംബൈയിലെ ആന്ടോപ്പ് ഹിൽ പോലീസ് സ്റ്റേഷനിലാണ് ഈ പരിഷ്കാരം ആദ്യം നടപ്പിലാക്കിയത്. കൂടാതെ ലോക്കപ്പുകളിലെ അടിസ്ഥാന സൗകര്യങ്ങളെയും നവീകരിക്കാനുള്ള പദ്ധതിയും പോലീസ് ആവിഷ്കരിച്ചിട്ടുണ്ട്.
ലോക്കപ്പുകളിൽ പ്രതികൾ ആത്മഹത്യ ചെയ്യുന്നതിന്റെ പശ്ചാത്തലത്തിൽ, 2020 മുതൽ 2023 വരെയുള്ള കാലയളവിൽ മഹാരാഷ്ട്രയിൽ 54-ൽ അധികം കസ്റ്റഡി മരണങ്ങളുണ്ടായതായി റിപ്പോർട്ടുകൾ സൂചിപ്പിക്കുന്നു. ഇതിൽ ഭൂരിഭാഗവും തൂങ്ങിമരണങ്ങളായിരുന്നു. ബോളിവുഡ് നടൻ സൽമാൻ ഖാന്റെ വീടിനു നേരെയുണ്ടായ വെടിവെപ്പ് കേസിലെ പ്രതി അനുജ് തപന്റെ മരണവുമായി ബന്ധപ്പെട്ടാണ് പോലീസ് ഇടപെട്ടത്. ലോക്കപ്പിൽ കിടക്കവിരി ഉപയോഗിച്ച് തൂങ്ങിമരിച്ച നിലയിൽ കണ്ടെത്തിയ തപന്റെ സംഭവം പോലീസിനെ കൂടുതൽ നിയന്ത്രണങ്ങൾ നടപ്പിലാക്കാൻ പ്രേരിപ്പിച്ചു.
Photo and News Source: Kairali News
