തിരുവനന്തപുരം: ശബരിമല സന്നിധാനത്തിന് മുകളിലൂടെ അനുമതി ഇല്ലാതെ കോസ്റ്റ് ഗാർഡ് ഹെലികോപ്റ്റർ പറന്ന സംഭവം ഗുരുതരമായ സുരക്ഷാലംഘനമായി റിപ്പോർട്ട് ചെയ്യപ്പെട്ടു. എഡിജിപി എസ് ശ്രീജിത്ത് തയ്യാറാക്കിയ റിപ്പോർട്ട് ഇന്ന് സ്പെഷ്യൽ കമ്മീഷണറുടെ മുന്നിൽ സമർപ്പിക്കും. കൊടിമരത്തിന് അഞ്ചടി മുകളിലായി നാലുവട്ടം പതിയെ പറന്ന ഹെലികോപ്റ്റർ, കാലാവസ്ഥാ പ്രശ്നം എന്ന വിശദീകരണം തൃപ്തികരമല്ലെന്ന് റിപ്പോർട്ടിൽ പറയുന്നു.
എയർട്രാഫിക് കൺട്രോൾ റൂമിൽ നിന്നുള്ള വിശദാംശങ്ങൾ ശേഖരിക്കാനും, കാലാവസ്ഥാ നിരീക്ഷണ കേന്ദ്രത്തിന്റെ റിപ്പോർട്ട് പരിഗണിക്കാനും, പൈലറ്റുമാരുടെ മൊഴി എടുക്കാനും റിപ്പോർട്ടിൽ നിർദ്ദേശിക്കുന്നു. ഉച്ചയ്ക്ക് 12 മണിയോടെ നടന്ന സംഭവത്തിൽ, ഹെലികോപ്റ്ററിലെ സഞ്ചാരികൾ ശ്രീകോവിലിന്റെ ചിത്രങ്ങൾ പകർത്തിയതായി സുരക്ഷാ ഉദ്യോഗസ്ഥർ പറയുന്നു. നിലക്കൽ, പമ്പ, സന്നിധാനം മേഖലകളിൽ ഡ്രോണുകൾ പോലും അനുവദനീയമല്ല. ഈ സാഹചര്യത്തിൽ, കോസ്റ്റ് ഗാർഡിന്റെ ഹെലികോപ്റ്ററും അനുമതി ഇല്ലാതെ സന്നിധാനത്തിന് മുകളിലൂടെ പറന്നത് അതീവ ഗൗരവമായി കണക്കാക്കപ്പെടുന്നു. എഡിജിപി ശ്രീജിത്തിന്റെ അന്വേഷണ റിപ്പോർട്ടും കോടതിക്ക് കൈമാറും.
Photo and News Source: Siraj Live
