തിരുവനന്തപുരം: കടുത്ത വേനൽക്കാലത്ത് അമീബിക് മസ്തിഷ്കജ്വരത്തിന്റെ വ്യാപനം വർദ്ധിക്കാനുള്ള സാധ്യതയെക്കുറിച്ച് ആരോഗ്യവകുപ്പ് മുന്നറിയിപ്പ് നൽകി. ശുദ്ധമല്ലാത്ത വെള്ളത്തില് കുളിക്കുകയോ മുഖം കഴുകുകയോ ചെയ്യരുതെന്ന് ആരോഗ്യമന്ത്രി വീണാ ജോർജ്ജ് നിർദ്ദേശിച്ചു. പൊതുസ്ഥലങ്ങളിലെ വെള്ളത്തിന്റെ ഗുണനിലവാരം പരിശോധിക്കുകയും ക്ലോറിനേഷൻ നടത്തുകയും വേണം. കിണറുകളും ടാങ്കുകളും ക്ലോറിനേറ്റ് ചെയ്യാനും നീന്തൽക്കുളങ്ങളെ ശുദ്ധമാക്കാനും നിർദ്ദേശം നൽകി. ആരോഗ്യ പ്രവർത്തകരുടെ നിരീക്ഷണം ശക്തമാക്കിയിട്ടുണ്ട്. അമീബിക് മസ്തിഷ്കജ്വരം കണ്ടെത്താനുള്ള പരിശോധനകളും വർദ്ധിപ്പിച്ചു.
രോഗലക്ഷണങ്ങൾ കാണുന്നവർ ഉടൻ ചികിത്സ തേടണമെന്നും മന്ത്രി വ്യക്തമാക്കി. വെള്ളത്തിലെ അക്കാന്തമീബ, നെഗ്ലേറിയ ഫൗളേറി എന്നീ സൂക്ഷ്മജീവികളാണ് രോഗഹേതു. ചൂടേറിയ തടാകങ്ങളിലും മലിനമായ കുളങ്ങളിലും ഇത് കാണപ്പെടുന്നു. രോഗപ്രതിരോധശേഷി കുറഞ്ഞവർ ശുദ്ധജലത്തിൽ മാത്രം മുറിവുകൾ വൃത്തിയാക്കണം. അമീബിക് മസ്തിഷ്കജ്വരത്തിനെതിരെ കേരളം ശക്തമായ നടപടികൾ സ്വീകരിച്ചു വരുന്നു.
Photo and News Source: Samakalika Malayalam
