താരസംഘടനയായ 'അമ്മ'യുടെ എക്സിക്യൂട്ടീവ് കമ്മിറ്റി ഇന്ന് അടിയന്തര യോഗം ചേരുന്നു. സംഘടനയിൽ ഉയർന്നിരിക്കുന്ന ഗുരുതരമായ തൊഴിൽ പീഡന പരാതികളും നേതൃത്വത്തിനെതിരെയുള്ള വിമർശനങ്ങളും ചർച്ച ചെയ്യാനാണ് യോഗം വിളിച്ചുചേർത്തിരിക്കുന്നത്. സംഘടനയുടെ പ്രസിഡന്റ് ശ്വേത മേനോൻ കാര്യങ്ങൾ ഒന്നും അറിയുന്നില്ല എന്ന ആരോപണം നടന്മാരായ ബാബുരാജും ടിനി ടോമും നേരത്തെ ഉന്നയിച്ചിരുന്നു.
അമ്മയിലെ ഫ്രണ്ട് ഓഫീസ് ജീവനക്കാരി ഉന്നയിച്ച തൊഴിൽ പീഡന പരാതിയാണ് സംഘടനയിൽ വലിയ പ്രതിസന്ധിക്ക് വഴിവെച്ചത്. ട്രഷറർ ഉണ്ണി ശിവപാൽ മാനസികമായി പീഡിപ്പിച്ചുവെന്നും, പരാതി നൽകിയാൽ ജോലിയിൽ നിന്ന് പുറത്താക്കുമെന്ന് ജനറൽ സെക്രട്ടറി കുക്കു പരമേശ്വരൻ ഭീഷണിപ്പെടുത്തിയെന്നും യുവതി ആരോപിച്ചിരുന്നു. ഇതിനെത്തുടർന്ന് കഴിഞ്ഞ ചൊവ്വാഴ്ച നടന്ന യോഗത്തിൽ ട്രഷറർക്ക് നിർബന്ധിത അവധി നൽകുകയും, പിരിച്ചുവിട്ട ജീവനക്കാരിയെ തിരിച്ചെടുക്കാൻ തീരുമാനിക്കുകയും ചെയ്തിരുന്നു.
എങ്കിലും, ജനറൽ സെക്രട്ടറി കുക്കു പരമേശ്വരൻ തന്റെ അധികാരം ദുരുപയോഗം ചെയ്തതായി ടിനി ടോം പരസ്യമായി ആരോപിച്ചു. കൂടാതെ, ജോയിന്റ് സെക്രട്ടറി അൻസിബ ഹസന്റെ രാജിയും സംഘടനയിൽ വലിയ ചർച്ചയായിട്ടുണ്ട്. വ്യക്തിപരമായ കാരണങ്ങളാലാണ് രാജിയെന്ന് പ്രസിഡന്റ് ശ്വേത മേനോൻ വിശദീകരിച്ചെങ്കിലും, നേതൃത്വത്തിനെതിരായ ആരോപണങ്ങളിൽ മനം മടുത്താണ് അൻസിബ പടിയിറങ്ങിയതെന്ന് ബാബുരാജ് വെളിപ്പെടുത്തി. ഈ സാഹചര്യത്തിൽ ഇന്നത്തെ യോഗം സംഘടനയ്ക്ക് നിർണ്ണായകമാണ്.
Photo and News Source: Sathyam Online
