ഇന്ത്യൻ ഹോസ്പിറ്റാലിറ്റി രംഗത്തെ പ്രമുഖരായ ഐടിസി ഹോട്ടൽസ്, കോട്ടയം കുമരകത്തെ പ്രശസ്തമായ പഞ്ചനക്ഷത്ര റിസോർട്ടായ 'ദ് സൂരി കുമരകം കേരള റിസോർട്ട് ആൻഡ് സ്പാ' ഏറ്റെടുക്കുന്നു. 205 കോടി രൂപയ്ക്കാണ് ഈ നിർണായക ഇടപാട് നടക്കുന്നത്. ഈ ഏറ്റെടുക്കലിലൂടെ റിസോർട്ടിന്റെ നൂറു ശതമാനം ഓഹരികളും ഐടിസിയുടെ ഉടമസ്ഥതയിലാകും. നടപടിക്രമങ്ങൾ ഉടൻ തന്നെ പൂർത്തിയാകുമെന്നാണ് റിപ്പോർട്ടുകൾ.
കേരളത്തിൽ ഐടിസി ഹോട്ടൽസിന്റെ ആദ്യത്തെ റിസോർട്ട് എന്ന പ്രത്യേകതയും ഇതിനുണ്ട്. ടൂറിസം മേഖലയിൽ വലിയ സാധ്യതകളുള്ള കേരളത്തിൽ തങ്ങളുടെ സാന്നിധ്യം കൂടുതൽ ശക്തമാക്കുക എന്ന ലക്ഷ്യത്തോടെയാണ് കമ്പനി ഇത്തരമൊരു നീക്കം നടത്തിയിരിക്കുന്നത്. പ്രീമിയം റിസോർട്ട് വിഭാഗത്തിൽ കേരളത്തിൽ കൂടുതൽ നിക്ഷേപങ്ങളും ഏറ്റെടുക്കലുകളും നടത്താൻ ഐടിസി പദ്ധതിയിടുന്നുണ്ട്.
വേമ്പനാട് കായലിന്റെ തീരത്തായി 18 ഏക്കർ വിസ്തൃതിയിലാണ് സൂരി റിസോർട്ട് സ്ഥിതി ചെയ്യുന്നത്. 38 വില്ലകളും കോട്ടേജുകളും ഉൾപ്പെടെ ആകെ 72 മുറികളാണ് ഇവിടെയുള്ളത്. കൂടാതെ, 20,000 ചതുരശ്രയടി വിസ്തീർണത്തിൽ അത്യാധുനിക സ്പാ, വെൽനസ് സൗകര്യങ്ങളും ഇവിടെ ഒരുക്കിയിട്ടുണ്ട്. ഐടിസി ഏറ്റെടുക്കുന്നതോടെ റിസോർട്ടിൽ പുതിയൊരു റെസ്റ്റോറന്റ് കൂടി നിർമിക്കുമെന്നാണ് വിവരം.
ദേശീയവും അന്തർദേശീയവുമായ പല പ്രധാന പരിപാടികൾക്കും വേദിയാകാറുള്ള ഈ റിസോർട്ട്, ഐടിസിയുടെ കീഴിൽ വരുന്നതോടെ കൂടുതൽ സഞ്ചാരികളെ ആകർഷിക്കാൻ സാധിക്കുമെന്നാണ് വിലയിരുത്തപ്പെടുന്നത്. ആഡംബര ടൂറിസത്തിൽ കേരളത്തിന്റെ സാധ്യതകൾ വർധിപ്പിക്കാൻ ഈ ഏറ്റെടുക്കൽ സഹായിക്കും.
Photo and News Source: Dhanam
