ഓഹരി വിപണിയിൽ ഇന്ന് മികച്ച മുന്നേറ്റം. വ്യാപാരത്തിന്റെ തുടക്കത്തിൽ ചെറിയ നേട്ടത്തോടെ തുടങ്ങിയ വിപണി പിന്നീട് മികച്ച നിലവാരത്തിലേക്ക് ഉയർന്നു. നിഫ്റ്റി 23,800 പോയിന്റും സെൻസെക്സ് 75,800 പോയിന്റും പിന്നിട്ടു. എന്നാൽ സ്മോൾക്യാപ് ഓഹരികൾ ഇന്ന് സമ്മർദ്ദത്തിലാണ്. കഴിഞ്ഞ ദിവസങ്ങളിൽ ഇടിവ് നേരിട്ട ഐടി ഓഹരികൾ ഇന്ന് ശക്തമായ തിരിച്ചുവരവ് നടത്തി. ഇൻഫോസിസ്, ടിസിഎസ് തുടങ്ങിയ പ്രമുഖ ഓഹരികളെല്ലാം രണ്ട് ശതമാനത്തിലധികം നേട്ടമുണ്ടാക്കി.
റിയൽറ്റി, ഓയിൽ-ഗ്യാസ്, മെറ്റൽ മേഖലകൾ രാവിലെ നഷ്ടത്തിലായിരുന്നു. പെട്രോൾ, ഡീസൽ വില വർധിപ്പിച്ചിട്ടും ഓയിൽ മാർക്കറ്റിംഗ് കമ്പനികളുടെ ഓഹരികൾ ഇന്നും താഴ്ചയിലാണ്. പ്രതീക്ഷിച്ച അത്ര വില വർധനവ് വരുത്താത്തതാണ് ഇതിന് കാരണമായി ചൂണ്ടിക്കാണിക്കപ്പെടുന്നത്. നാലാം പാദ ഫലങ്ങൾ പുറത്തുവന്നതിന് പിന്നാലെ മുത്തൂറ്റ് ഫിനാൻസ് ഓഹരികൾ ആറ് ശതമാനത്തോളം ഇടിഞ്ഞു. ജെഫറീസ്, മോർഗൻ സ്റ്റാൻലി തുടങ്ങിയ സ്ഥാപനങ്ങൾ ഓഹരിയുടെ ലക്ഷ്യവില കുറച്ചു നിശ്ചയിച്ചു.
അദാനി ഗ്രൂപ്പ് ഓഹരികൾ തുടക്കത്തിൽ നേട്ടമുണ്ടാക്കിയെങ്കിലും പിന്നീട് നഷ്ടത്തിലേക്ക് മാറി. അമേരിക്കൻ കോടതിയിലെ കേസ് പിൻവലിക്കാൻ സാധ്യതയുണ്ടെന്ന റിപ്പോർട്ടുകളാണ് തുടക്കത്തിൽ കരുത്തായത്. ടാറ്റാ മോട്ടോഴ്സ് ഓഹരികൾ എട്ട് ശതമാനത്തോളം കുതിച്ചു. ഇന്ത്യൻ ബിസിനസിലെ മികച്ച വളർച്ചയാണ് ഇതിന് സഹായകമായത്. ജിഇ ഷിപ്പിംഗ്, അപ്പോളോ ടയേഴ്സ്, ഷീല ഫോം തുടങ്ങിയ ഓഹരികളും ഇന്ന് മികച്ച പ്രകടനം കാഴ്ചവെച്ചു.
വിദേശ വിപണിയിൽ ഡോളറിനെതിരെ രൂപയുടെ മൂല്യം ഇടിഞ്ഞു. ഡോളർ 11 പൈസ വർധിച്ച് 95.87 രൂപയിലാണ് വ്യാപാരം തുടങ്ങിയത്. സ്വർണവിലയിൽ വർധനവുണ്ടായി. കേരളത്തിൽ 22 കാരറ്റ് സ്വർണം പവന് 240 രൂപ വർധിച്ച് 1,19,040 രൂപയായി. അതേസമയം, വെള്ളി വിലയിൽ വലിയ ഇടിവ് രേഖപ്പെടുത്തി. എംസിഎക്സിൽ വെള്ളി കിലോഗ്രാമിന് 10,000 രൂപയോളം കുറഞ്ഞു. ക്രൂഡ് ഓയിൽ വിലയിൽ നേരിയ വർധനവ് തുടരുകയാണ്.
Photo and News Source: Dhanam
