പശ്ചിമേഷ്യയിലെ സംഘർഷാവസ്ഥയെത്തുടർന്ന് ആഗോള വിപണിയിൽ ക്രൂഡ് ഓയിൽ വിലയിലുണ്ടായ ചാഞ്ചാട്ടം ഇന്ത്യയിലെ ഇന്ധനവിലയെയും ബാധിച്ചു. വെള്ളിയാഴ്ച എണ്ണക്കമ്പനികൾ പെട്രോളിന്റെയും ഡീസലിന്റെയും വിലയിൽ ലിറ്ററിന് മൂന്ന് രൂപയുടെ വർധനവാണ് വരുത്തിയത്. ഇതോടെ രാജ്യത്തെ പ്രധാന നഗരങ്ങളിൽ ഇന്ധനവില കുത്തനെ ഉയർന്നു.
പുതിയ നിരക്കുകൾ പ്രകാരം ദേശീയ തലസ്ഥാനമായ ദൽഹിയിൽ പെട്രോൾ വില 97.77 രൂപയായും ഡീസൽ വില 90.67 രൂപയായും വർധിച്ചു. കൊൽക്കത്ത, മുംബൈ, ചെന്നൈ തുടങ്ങിയ മെട്രോ നഗരങ്ങളിലും സമാനമായ രീതിയിൽ വില വർധനവ് രേഖപ്പെടുത്തിയിട്ടുണ്ട്. അന്താരാഷ്ട്ര വിപണിയിലെ സമ്മർദ്ദം ചില്ലറ ഇന്ധന വിപണികളിലും പ്രതിഫലിക്കുന്നതിന്റെ സൂചനയാണിത്.
കഴിഞ്ഞ കുറച്ചു മാസങ്ങളായി ആഗോള വിപണിയിലെ പ്രതിസന്ധികൾക്കിടയിലും ഇന്ത്യയിൽ ഇന്ധനവിലയിൽ വലിയ മാറ്റങ്ങൾ വരുത്താതെ പിടിച്ചുനിർത്താൻ സാധിച്ചിരുന്നു. എന്നാൽ, പശ്ചിമേഷ്യയിലെ സംഘർഷം രൂക്ഷമാവുകയും ക്രൂഡ് ഓയിൽ വില കുതിച്ചുയരുകയും ചെയ്തതോടെ നിലവിലെ വില നിലനിർത്തുന്നത് എണ്ണക്കമ്പനികൾക്ക് ദുഷ്കരമായി മാറി. വിതരണക്കാർക്കും ഉപഭോക്താക്കൾക്കും ഇടയിൽ ഈ സാഹചര്യം വലിയ ആശങ്കയാണ് സൃഷ്ടിച്ചിരിക്കുന്നത്.
ഈ സാഹചര്യത്തിൽ ഇന്ധന ഉപയോഗം പരമാവധി കുറയ്ക്കണമെന്നും സ്വർണം വാങ്ങുന്നത് പരിമിതപ്പെടുത്തണമെന്നും പ്രധാനമന്ത്രി നരേന്ദ്ര മോദി ജനങ്ങൾക്ക് നിർദ്ദേശം നൽകി. എണ്ണ വിഭവങ്ങൾ ബുദ്ധിപൂർവ്വം ഉപയോഗിക്കണമെന്നും, സാധ്യമായ ഇടങ്ങളിൽ 'വർക്ക് ഫ്രം ഹോം' രീതി പിന്തുടരണമെന്നും അദ്ദേഹം അഭ്യർത്ഥിച്ചു. പശ്ചിമേഷ്യൻ പ്രതിസന്ധിയുടെ പശ്ചാത്തലത്തിൽ രാജ്യം അതീവ ജാഗ്രതയിലാണ്.
Photo and News Source: Janmabhumi
