ഉത്തർപ്രദേശിലെ വിവിധ ജില്ലകളിൽ ബുധനാഴ്ചയുണ്ടായ അതിശക്തമായ കൊടുങ്കാറ്റിലും മഴയിലും മിന്നലിലും വൻ നാശനഷ്ടങ്ങളാണ് റിപ്പോർട്ട് ചെയ്തിരിക്കുന്നത്. സംസ്ഥാനത്തുടനീളം 89-ലധികം ആളുകൾക്ക് ജീവൻ നഷ്ടപ്പെട്ടതായാണ് ഔദ്യോഗിക കണക്കുകൾ വ്യക്തമാക്കുന്നത്. നിരവധി പേർക്ക് പരിക്കേൽക്കുകയും ചെയ്തിട്ടുണ്ട്. ഇതിനിടയിലാണ് ബറേലിയിൽ നിന്നുള്ള ഞെട്ടിക്കുന്ന ദൃശ്യങ്ങൾ സമൂഹമാധ്യമങ്ങളിൽ വൈറലായിരിക്കുന്നത്.
ബറേലി ജില്ലയിലെ ഭാമോറ പോലീസ് സ്റ്റേഷൻ പരിധിയിലുള്ള ബാമിയാന ഗ്രാമത്തിലാണ് സംഭവം നടന്നത്. ശക്തമായ കാറ്റിൽ വീടിന്റെ മേൽക്കൂര പറന്നുപോകുന്നത് തടയാൻ ശ്രമിച്ച നാൻഹെ മിയാൻ എന്ന യുവാവാണ് അപകടത്തിൽപ്പെട്ടത്. കാറ്റ് വീശിയപ്പോൾ മേൽക്കൂരയിൽ കെട്ടിയിരുന്ന കയറിൽ പിടിച്ചുനിന്ന ഇദ്ദേഹം, മേൽക്കൂരയ്ക്കൊപ്പം വായുവിലേക്ക് ഉയർത്തപ്പെടുകയായിരുന്നു.
ഏകദേശം 50 അടി ഉയരത്തിൽ വരെ പറന്നുയർന്ന യുവാവ് പിന്നീട് താഴേക്ക് പതിക്കുകയായിരുന്നു. ഈ ദാരുണമായ സംഭവത്തിന്റെ ദൃശ്യങ്ങൾ സിസിടിവി ക്യാമറയിൽ പതിഞ്ഞിട്ടുണ്ട്. അപകടത്തിൽ ഗുരുതരമായി പരിക്കേറ്റ നാൻഹെ മിയാന്റെ കൈകാലുകൾക്ക് ഒടിവുണ്ട്. നിലവിൽ അദ്ദേഹം ആശുപത്രിയിൽ ചികിത്സയിലാണ്. പ്രകൃതിക്ഷോഭത്തിൽ പെട്ട യുവാവിന്റെ വീഡിയോ ഇപ്പോൾ വലിയ ചർച്ചയായിരിക്കുകയാണ്.
Photo and News Source: Samakalika Malayalam
