തൃശ്ശൂരിലെ മുണ്ടത്തിക്കോട് വെടിക്കെട്ട് നിര്മ്മാണ ശാലയിൽ ഉണ്ടായ അപകടത്തെക്കുറിച്ച് മജിസ്റ്റീരിയൽ അന്വേഷണം നടക്കുന്നു. ജില്ലാ കളക്ടർ ശിഖ സുരേന്ദ്രൻ ഉത്തരവിട്ടതനുസരിച്ച്, ആർഡിഒയെ ചുമതലപ്പെടുത്തി അപകട കാരണവും അനന്തരഫലങ്ങളും വിശദമായി അന്വേഷിക്കും. സംഭവത്തിന്റെ തത്സമയ വിവരങ്ങൾ ലഭ്യമാക്കാൻ രണ്ട് കൺട്രോൾ റൂമുകളും പ്രവർത്തനമാരംഭിച്ചു. മുണ്ടത്തിക്കോട് വില്ലേജ് ഓഫീസ്: 8547614620, തൃശ്ശൂർ താലൂക്ക് ഓഫീസ്: 04884232226.
വയലിന് നടുവിലുള്ള വിസ്തൃതമായ പറമ്പിലേക്ക് എത്തിച്ചേരാനുള്ള ഇടുങ്ങിയ വഴി രക്ഷാപ്രവർത്തകരെ വലച്ചു. തൃശ്ശൂർ, വടക്കാഞ്ചേരി, കുന്നംകുളം എന്നിവിടങ്ങളിൽ നിന്നുള്ള ഫയർ എഞ്ചിനുകൾ എത്തിയെങ്കിലും രണ്ടുമണിക്കൂർ കഴിഞ്ഞേ സംഭവസ്ഥലത്തേക്ക് പ്രവേശിക്കാൻ കഴിഞ്ഞുള്ളൂ. തുടർന്ന് ജെസിബി ഉപയോഗിച്ച് മതിലുകൾ തകർത്ത് ഫയർ എഞ്ചിനുകളെ അപകട സ്ഥലത്തേക്ക് നയിച്ചു.
ദുരന്ത സ്ഥലത്തേക്ക് പ്രവേശനം സാദ്ധ്യമല്ലാത്തതിനാൽ ഡ്രോണുകളിലൂടെയാണ് രക്ഷാദൗത്യത്തിന് നേതൃത്വം നൽകിയത്. പരിക്കേറ്റവരുടെ കണ്ടെത്തലിനും ഡ്രോണുകളെയായിരുന്നു ആശ്രയിച്ചത്. തുടർച്ചയായി സ്ഫോടനങ്ങളും പൊട്ടാതെ കിടക്കുന്ന സ്ഫോടക വസ്തുക്കളും മൂലം രക്ഷാദൗത്യം തടസ്സപ്പെട്ടു. ഡ്രോണുകളുടെ സഹായത്തോടെ പരിക്കേറ്റ പലരെയും കണ്ടെത്തി ആശുപത്രിയിലേക്ക് മാറ്റി. മുണ്ടത്തിക്കോട് പന്തലങ്ങാട്ട് സതീഷ് (47) ആണ് വെടിക്കെട്ട് കരാറുകാരൻ. 15 വർഷമായി തൃശ്ശൂർ പൂരത്തിനായി വെടിക്കെട്ടുകൾ ഒരുക്കുകയായിരുന്നു അദ്ദേഹം.
Photo and News Source: Janmabhumi
