കുളത്തൂപ്പുഴയിലും പരിസരപ്രദേശങ്ങളിലും വേനൽമഴ ലഭിക്കാത്തതോടെ ചൂടും വരൾച്ചയും കടുത്തുനിന്നു. പകലും രാത്രിയും ഒരുപോലെ ശക്തമായ ചൂടിൽ അന്തരീക്ഷതാപനില ക്രമാതീതമായി ഉയർന്നു. കിഴക്കൻ മലയോരമേഖലയിലെ പ്രധാന ജലസ്രോതസ്സായ കുളത്തൂപ്പുഴയാറിലേക്ക് വെള്ളം എത്തിക്കുന്ന കൈവഴികളായ തോടുകളിലും അരുവികളിലും നീരൊഴുക്ക് നിലച്ചു. പലയിടത്തും അരുവികൾ വറ്റി, ഒഴുകിയിരുന്നതുപോലും തിരിച്ചറിയാനാകാത്തവിധം മാറി. സമീപപ്രദേശങ്ങളിലെല്ലാം കുറഞ്ഞ തോതിൽ മഴ ലഭിച്ചെങ്കിലും കുളത്തൂപ്പുഴയിലും അതിന്റെ വൃഷ്ടിപ്രദേശങ്ങളിലും മഴയൊന്നും പെയ്യാതെ വരൾച്ച ബാധിച്ചു.
മുൻവർഷങ്ങളിൽ വിഷുവിനോടനുബന്ധിച്ച് ശക്തമായ മഴ ലഭിച്ചിരുന്ന ഈ പ്രദേശത്ത് ഈ വർഷം ഒരു മഴപോലും ലഭിച്ചില്ല. വനത്തിനുള്ളിലെ നീർച്ചാലുകൾ വറ്റിയതോടെ കാട്ടുമൃഗങ്ങൾ ജനവാസമേഖലയിലേക്ക് വരാൻ തുടങ്ങി. കർഷകർ പച്ചക്കറി കൃഷികൾ നനച്ചിരുന്ന കുളങ്ങളും ഉറവകളും വറ്റിയതോടെ കൃഷിയിടങ്ങൾ കരിഞ്ഞുപോകുമെന്ന ഭീതിയിലാണ് കർഷകർ.
Photo and News Source: Mathrubhumi
