കേരളത്തിൽ യു.ഡി.എഫിന്റെ മികച്ച വിജയത്തിന് പിന്നാലെ മുഖ്യമന്ത്രിയെ തീരുമാനിക്കാനുള്ള ചർച്ചകൾ സജീവമാകുമ്പോൾ, വി.ഡി. സതീശന് പരസ്യ പിന്തുണയുമായി രംഗത്തെത്തിയിരിക്കുകയാണ് നടൻ സിദ്ദിഖ്. മുഖ്യമന്ത്രി സ്ഥാനത്തേക്ക് വി.ഡി. സതീശനല്ലാതെ മറ്റൊരാളെക്കുറിച്ച് ചിന്തിക്കാൻ പോലും കഴിയില്ലെന്ന് അദ്ദേഹം തന്റെ ഫേസ്ബുക്ക് കുറിപ്പിലൂടെ വ്യക്തമാക്കി. രാഹുൽ ഗാന്ധിയെപ്പോലും ആ സ്ഥാനത്ത് സങ്കൽപ്പിക്കാൻ കഴിയില്ലെന്നും സിദ്ദിഖ് കൂട്ടിച്ചേർത്തു.
തിരഞ്ഞെടുപ്പിൽ നൂറിലധികം സീറ്റുകൾ നേടി യു.ഡി.എഫ് അധികാരത്തിൽ വരുമെന്നും, അല്ലാത്തപക്ഷം രാഷ്ട്രീയ വനവാസത്തിന് തയ്യാറാണെന്നും ഉറച്ച ശബ്ദത്തിൽ പ്രഖ്യാപിച്ച ഏക നേതാവ് സതീശനാണെന്ന് സിദ്ദിഖ് ചൂണ്ടിക്കാട്ടി. സാമുദായിക നേതാക്കളുടെ സമ്മർദ്ദങ്ങൾക്ക് വഴങ്ങാത്ത, മതനിരപേക്ഷത ഉയർത്തിപ്പിടിക്കുന്ന സതീശനെയാണ് ജനങ്ങൾ അടുത്ത മുഖ്യമന്ത്രിയായി കാണാൻ ആഗ്രഹിക്കുന്നത്.
അധികാര വടംവലികൾക്കിടയിൽ ഗ്രൂപ്പ് സമവാക്യങ്ങളുടെ പേരിൽ മറ്റാരെയെങ്കിലും മുഖ്യമന്ത്രിയാക്കിയാൽ ജനങ്ങൾ അത് അംഗീകരിക്കില്ലെന്നും അദ്ദേഹം മുന്നറിയിപ്പ് നൽകി. നേതാക്കളുടെ അഭിപ്രായങ്ങൾക്കപ്പുറം ജനവികാരം കൂടി പരിഗണിച്ച് ഹൈക്കമാൻഡ് തീരുമാനമെടുക്കണമെന്നും അദ്ദേഹം ആവശ്യപ്പെട്ടു. കെ. കരുണാകരനെയും ഉമ്മൻ ചാണ്ടിയെയും ഹൃദയത്തിൽ സൂക്ഷിക്കുന്ന ഒരു സാധാരണക്കാരന്റെ അപേക്ഷയാണിതെന്ന് പറഞ്ഞാണ് സിദ്ദിഖ് തന്റെ കുറിപ്പ് അവസാനിപ്പിച്ചത്.
കോൺഗ്രസിനുള്ളിൽ മുഖ്യമന്ത്രി സ്ഥാനത്തെച്ചൊല്ലി വി.ഡി. സതീശൻ, കെ.സി. വേണുഗോപാൽ, രമേശ് ചെന്നിത്തല എന്നിവരുടെ പേരുകൾ ഉയർന്നു കേൾക്കുന്നതിനിടയിലാണ് സിദ്ദിഖിന്റെ ഈ തുറന്നുപറച്ചിൽ. സിദ്ദിഖിന്റെ ഫേസ്ബുക്ക് പോസ്റ്റ് ഇതിനകം തന്നെ സമൂഹമാധ്യമങ്ങളിൽ വലിയ ചർച്ചയായി മാറിയിരിക്കുകയാണ്.
Photo and News Source: Suprabhaatham
