കണ്ണൂരിൽ വി. കുഞ്ഞികൃഷ്ണന് ഡിസിസി ഓഫീസിൽ സ്വീകരണം നല്കി. പയ്യന്നൂരിൽ നിന്നും യുഡിഎഫ് സ്വതന്ത്രനായി മത്സരിച്ച കുഞ്ഞികൃഷ്ണൻ വൈകിട്ട് 4.30 മണിയോടെ കണ്ണൂരിലെത്തി. ഡിസിസി പ്രസിഡന്റ് മാര്ട്ടിന് ജോര്ജിന്റെ നേതൃത്വത്തില് മൂവര്ണ ഷാള് അണിയിച്ചു സ്വീകരിച്ചു. തുടര്ന്ന് കേക്ക് മുറിച്ച് വിജയ മധുരം പങ്കിട്ടു. അടച്ചിട്ട ഓഫീസ് മുറിയില് നേതാക്കളുമായി അര മണിക്കൂറോളം കൂടിക്കാഴ്ച്ച നടത്തി. മാധ്യമങ്ങളെ കണ്ട കുഞ്ഞികൃഷ്ണൻ, യുഡിഎഫ് പിന്തുണയോടെ സ്വതന്ത്രനായി ജയിച്ചതിനാല് ഭരിക്കുന്നവരോടൊപ്പം പ്രവര്ത്തിക്കുമെന്ന് പ്രസ്താവിച്ചു.
'യുഡിഎഫിനൊപ്പം പ്രവര്ത്തിക്കും' എന്ന് അദ്ദേഹം പറഞ്ഞു. ഒരു പാര്ട്ടിയിലും ചേരാന് തീരുമാനിച്ചിട്ടില്ലെന്നും, സമാന മനസ്കരുമായി ചേര്ന്ന് ഈ കാര്യം തീരുമാനിക്കുമെന്നും അദ്ദേഹം വ്യക്തമാക്കി. 'നേതൃത്ഥം തെറ്റുതിരുത്താന് തയ്യാറായില്ലെങ്കില് കേരളവും ബംഗാളാകും' എന്ന് തന്റെ പുസ്തകത്തില് പറഞ്ഞിട്ടുണ്ടെന്നും അദ്ദേഹം സൂചിപ്പിച്ചു. തെറ്റുകള് തിരുത്തുന്നതാണ് കമ്മ്യൂണിസ്റ്റ് പാര്ട്ടിയുടെ രീതി, തെറ്റു ചെയ്യുന്നവരെ സംരക്ഷിക്കുന്നതല്ലെന്നും അദ്ദേഹം അഭിപ്രായപ്പെട്ടു.
രക്തസാക്ഷി ഫണ്ടിലെ ക്രമക്കേടിനെ ചൂണ്ടിക്കാട്ടിയതിനാലാണ് തന്നെ പുറത്താക്കിയതെന്നും, കുറ്റം ചെയ്തവരെ സംരക്ഷിച്ചതിനാലാണ് താന് മത്സരിക്കാന് നിര്ബന്ധിതനായതെന്നും അദ്ദേഹം വിശദീകരിച്ചു. പാര്ട്ടി സെക്രട്ടറി മാറിയതുകൊണ്ടു മാത്രം സിപിഎമ്മിന്റെ വീഴ്ച്ച മറക്കാന് കഴിയില്ലെന്നും, ഒരാള് തന്നെ തീരുമാനമെടുക്കുന്ന ഏകാധിപത്യ ശൈലി മാറണമെന്നും അദ്ദേഹം പറഞ്ഞു.
കുഞ്ഞികൃഷ്ണനൊപ്പം രാഷ്ട്രീയ നിരീക്ഷകനും ആര് എസ് പി പ്രതിനിധിയുമായ അഡ്വ. ബിഎന് അസ്റും, മേയര് അഡ്വ പി. ഇന്ദിര, അബ്ദുള് റഷീദ് കവ്വായി, റിജില് മാക്കുറ്റി, പി. മുഹമ്മദ് ഷമ്മാസ് തുടങ്ങിയവരും സ്വീകരണത്തില് പങ്കെടുത്തു. യുഡിഎഫ് പിന്തുണയോടെ സ്വതന്ത്രനായി മത്സരിച്ച കുഞ്ഞികൃഷ്ണന്റെ വിജയത്തെ തുടര്ന്നുള്ള രാഷ്ട്രീയ ചർച്ചകള് പൊതു വേദികളില് ശ്രദ്ധേയമായി.
Photo and News Source: Samakalika Malayalam
