ഓരോ വ്യക്തിക്കും ഓരോ ഇഷ്ട നിറങ്ങളുണ്ടെന്നത് പോലെ, ഓരോ ദിവസത്തിനും അനുകൂലമായ നിറങ്ങളുണ്ട്. ആഴ്ചയിലെ ഓരോ ദിവസവും നവഗ്രഹങ്ങളിലെ ഏഴ് സ്ഥിരഗ്രഹങ്ങളെ പ്രതിനിധീകരിക്കുന്നതായി വിശ്വാസമുണ്ട്. ഓരോ ദിനത്തിലും അതാത് ഗ്രഹത്തെ സ്വാധീനിക്കുന്ന നിറങ്ങൾ ധരിക്കുന്നത് ഭാഗ്യവർദ്ധനവിനും ജീവിതപുരോഗതിക്കും കാരണമാകുമെന്ന് പറയപ്പെടുന്നു. കൂടാതെ, ഓരോ ദിവസത്തിന്റെയും ഗ്രഹാധിപന്മാരുടെ സ്തോത്രം ജപിക്കുന്നതും ഇരട്ടി ഫലം നൽകുമെന്ന് വിശ്വസിക്കപ്പെടുന്നു.
ഞായറാഴ്ചയുടെ അധിപൻ സൂര്യനാണ്. അതിനാൽ, ഓറഞ്ച് നിറത്തിലുള്ള വസ്ത്രങ്ങളും ആഭരണങ്ങളും ധരിച്ച് സൂര്യദേവനെ സ്മരിക്കുന്നത് ഉത്തമമാണ്. ചന്ദ്രാധിപത്യമുള്ള തിങ്കളാഴ്ച വെളുത്ത, ചന്ദന നിറത്തിലുള്ള വസ്ത്രങ്ങളും വെളളനിറത്തിലുള്ള ആഭരണങ്ങളും ധരിക്കാൻ ശുപാർശ ചെയ്യപ്പെടുന്നു. മന്ദാരം, നന്ത്യാർവട്ടം, മുല്ല തുടങ്ങിയ വെളുത്ത പുഷ്പങ്ങൾ ചൂടുന്നതും നല്ലതാണ്. കൂടാതെ, സിൽവർ, ചാര, ഇളം നീല നിറങ്ങളിലുള്ള വസ്ത്രങ്ങളും അനുയോജ്യമാണ്.
ചൊവ്വാഴ്ചയുടെ അധിപൻ കുജനാണ്. മനുഷ്യന്റെ ബലവും ശരീരശക്തിയും സൂചിപ്പിക്കുന്നതിനാൽ, കുജപ്രീതിക്കായി ചുവപ്പ് നിറത്തിലുള്ള വസ്ത്രങ്ങളും പവിഴം, റൂബി തുടങ്ങിയ ആഭരണങ്ങളും ധരിക്കാം. കുജൻ ജാതകത്തിൽ അനിഷ്ടസ്ഥിതിയിലാണെങ്കിൽ, ബന്ധുക്കളുമായി കലഹം, ശത്രുദോഷം, അപകടസാധ്യത, രോഗപീഡ എന്നിവയ്ക്കുള്ള സാധ്യത കുറയ്ക്കാൻ ചുവപ്പ് നിറമുള്ള വസ്ത്രം ധരിച്ച് സുബ്രഹ്മണ്യനെയോ ഭദ്രകാളിയെയോ ഭജിക്കാം.
ബുധാഴ്ചയുടെ അധിപൻ ബുധനാണ്. ബുധപ്രീതിക്കായി പച്ച നിറമുള്ള വസ്ത്രവും മരതകം, പെരിഡോട്ട് പോലുള്ള കല്ലുകളും ധരിക്കാം. പുതിയ കാര്യങ്ങൾ തുടങ്ങാനും എഴുത്തും വായനയും ശീലമാക്കാനും ബുധനാഴ്ച ഉത്തമമാണ്. ധനസൗഭാഗ്യങ്ങളുടെ കാരകനായ വ്യാഴാഴ്ച മഞ്ഞ നിറത്തിലുള്ള വസ്ത്രങ്ങളും മഞ്ഞ പുഷ്യരാഗവും അണിയാൻ ശുപാർശ ചെയ്യപ്പെടുന്നു. മഞ്ഞ കലർന്ന വസ്ത്രങ്ങളും സ്വർണ്ണാഭരണങ്ങളും ധരിക്കാവുന്നതാണ്.
വെള്ളിയാഴ്ചയുടെ അധിപൻ ശുക്രനാണ്. ചുവപ്പ്, വെളള, പിങ്ക് നിറങ്ങൾ ഈ ദിവസം ധരിക്കാൻ അനുയോജ്യമാണ്. ശനിയാഴ്ചയുടെ അധിപൻ ശനിയാണ്. ജ്യോതിഷത്തിൽ ശനിയുടെ അധിദേവത ശാസ്താവാണ്. അതിനാൽ, ശനിയാഴ്ച ശാസ്താക്ഷേത്ര ദർശനം ഉത്തമമാണ്. കറുപ്പോ നീലയോ വസ്ത്രം ധരിക്കാം. ഇന്ദ്രനീലം, സോഡാലൈറ്റ് തുടങ്ങിയ നീലക്കല്ലുകളും അണിയാം.
Photo and News Source: Janmabhumi
