ന്യൂഡൽഹി: ദേശീയഗാനമായ 'ജനഗണമന'-യ്ക്ക് തുല്യമായ പദവി 'വന്ദേമാതര'ത്തിനും നല്കാനുള്ള കേന്ദ്രസര്ക്കാരിന്റെ തീരുമാനത്തിന് കാബിനറ്റ് അംഗീകാരം നല്കി. പശ്ചിമബംഗാള്, തമിഴ്നാട്, കേരളം, അസം, പുതുച്ചേരി എന്നിവിടങ്ങളിലെ തെരെഞ്ഞെടുപ്പ് ഫലം പ്രഖ്യാപിച്ചതിന് ശേഷം ചൊവ്വാഴ്ച ചേര്ന്ന മന്ത്രിസഭാ യോഗത്തിലാണ് ഈ തീരുമാനം എടുത്തത്. യോഗത്തിൽ പശ്ചിമബംഗാളിലെ ചരിത്രവിജയത്തില് മന്ത്രിമാര് പ്രധാനമന്ത്രിയെ അഭിനന്ദിച്ചു. നിലവിലുള്ള 'ദേശീയ ബഹുമതികളോടുള്ള അവഹേളനം തടയല് നിയമം' ഭേദഗതി ചെയ്യുന്നതിലൂടെ, 'വന്ദേമാതര'ത്തിന് 'ജനഗണമന'-യ്ക്ക് ലഭിക്കുന്ന അതേ നിയമപരമായ സംരക്ഷണവും ആദരവും ഉറപ്പാക്കും.
'വന്ദേമാതര' ആലപിക്കുമ്പോള് അല്ലെങ്കില് പ്രദര്ശിപ്പിക്കുമ്പോള് തടസ്സപ്പെടുത്തുകയോ അപമാനിക്കുകയോ ചെയ്യുന്ന പ്രവൃത്തികള് ജാമ്യമില്ലാ കുറ്റമായി കണക്കാക്കപ്പെടും. നിലവിലുള്ള നിയമപ്രകാരം ദേശീയഗാനത്തിന് ലഭിക്കുന്ന മൂന്ന് വര്ഷം വരെ തടവോ പിഴയോ അല്ലെങ്കില് രണ്ടും കൂടിയോ ശിക്ഷാ വ്യവസ്ഥ വന്ദേമാതരത്തിനും ബാധകമാണ്. കുറ്റം ആവര്ത്തിക്കുന്നവര്ക്ക് കുറഞ്ഞത് ഒരു വര്ഷം തടവ് ശിക്ഷ ലഭിക്കും. 2024-ൽ 'വന്ദേമാതര'ത്തിന്റെ 150-ാം വാര്ഷികം ആഘോഷിക്കുന്ന സന്ദര്ഭത്തിലാണ് ഈ തീരുമാനം പ്രഖ്യാപിച്ചത്. കഴിഞ്ഞ ഡിസംബറില് പാര്ലമെന്റില് നടന്ന ചര്ച്ചയിലും 'വന്ദേമാതര'ത്തിന് തുല്യ പദവി നല്കണമെന്ന ആവശ്യം ഉയര്ന്നിരുന്നു.
'ജനഗണമന'യ്ക്ക് ലഭിക്കുന്ന അതേ നിയമപരമായ സംരക്ഷണവും ആദരവും 'വന്ദേമാതര'ത്തിനും ലഭിക്കുമെന്നുള്ള ഈ തീരുമാനം, ദേശീയ ചിഹ്നങ്ങളോടുള്ള ആദരവ് വർദ്ധിപ്പിക്കുമെന്നാണ് കേന്ദ്രസര്ക്കാരിന്റെ വാദം. ദേശീയ ഐക്യത്തെയും സംസ്കാരത്തെയും പ്രതിഫലിപ്പിക്കുന്ന ഈ തീരുമാനം, രാജ്യത്തിന്റെ ഐക്യദാർഢ്യത്തെ ബലപ്പെടുത്തുമെന്ന് പ്രതീക്ഷിക്കുന്നു.
Photo and News Source: Samakalika Malayalam
