തിരുവനന്തപുരം: നിയമസഭാ തെരഞ്ഞെടുപ്പിൽ യുഡിഎഫിന്റെ വിജയത്തിനുശേഷം കേരളത്തിൽ മുഖ്യമന്ത്രി പദത്തിനായുള്ള പോര് തെരുവുകളിലേക്ക് വ്യാപിച്ചു. കൊല്ലത്തും കോതമംഗലത്തും പ്രമുഖ നേതാക്കൾക്കായി ഫ്ലെക്സ് ബോർഡുകൾ സ്ഥാപിച്ചതോടെ പാർട്ടിയിലെ വിഭാഗീയത പരസ്യമായി പുറത്തുവന്നു. വി.ഡി. സതീശൻ, രമേശ് ചെന്നിത്തല, കെ.സി. വേണുഗോപാൽ എന്നിവരെ പിന്തുണച്ചുകൊണ്ട് വിവിധയിടങ്ങളിൽ ബോർഡുകൾ പ്രത്യക്ഷപ്പെട്ടു.
കൊല്ലം മൺറോതുരുത്തിൽ വി.ഡി. സതീശന് വേണ്ടി കോൺഗ്രസ് മണ്ഡലം കമ്മിറ്റി ‘പട നയിച്ചവൻ കേരളം നയിക്കട്ടെ’ എന്ന വാചകത്തോടെ ബോർഡുകൾ സ്ഥാപിച്ചു. വരുന്ന മണിക്കൂറുകളിൽ കൂടുതൽ ബോർഡുകൾ സ്ഥാപിക്കുമെന്ന് പ്രവർത്തകർ വ്യക്തമാക്കി. അതേസമയം, കൊല്ലം നഗരത്തിൽ രമേശ് ചെന്നിത്തലയെ പിന്തുണച്ചുകൊണ്ട് യൂത്ത് കോൺഗ്രസിന്റെ പേരിലും ബോർഡുകൾ ഉയർന്നു. ചിന്നക്കട, എസ്.എൻ കോളജ് പരിസരങ്ങളിൽ ‘ജനപക്ഷ നേതാവ്’, ‘പ്രവർത്തകരുടെ മനസ്സറിഞ്ഞ നേതാവ് കേരളം നയിക്കട്ടെ’ എന്നീ വാചകങ്ങളോടെ ചെന്നിത്തലയുടെ ചിത്രങ്ങൾ പതിപ്പിച്ച ബോർഡുകൾ പ്രത്യക്ഷപ്പെട്ടു.
കോതമംഗലത്തും ഇതേ അവസ്ഥ തുടർന്നു. കോതമംഗലം പി.ഒ ജംഗ്ഷനിൽ ‘ടീം യുഡിഎഫി’ന്റെ പേരിലാണ് വി.ഡി. സതീശനും കെ.സി. വേണുഗോപാലിനും വേണ്ടി ബോർഡുകൾ സ്ഥാപിച്ചിരിക്കുന്നത്. അടുത്തടുത്തായി വെച്ചിരിക്കുന്ന ഈ ഫ്ലെക്സുകൾ വരാനിരിക്കുന്ന നേതൃമാറ്റ ചർച്ചകളിൽ തങ്ങളുടെ നേതാക്കൾക്ക് മുൻഗണന ലഭിക്കാനുള്ള പ്രവർത്തകരുടെ നീക്കമായാണ് വിലയിരുത്തപ്പെടുന്നത്. പാർട്ടിയിലെ വിഭാഗീയത പരസ്യമാകുന്നതോടെ, മുഖ്യമന്ത്രി പദത്തിനായുള്ള പോര് കൂടുതൽ തീവ്രമാകുമെന്നാണ് നിരീക്ഷകർ അഭിപ്രായപ്പെടുന്നത്.
Photo and News Source: Malayalam Express
