പതിറ്റാണ്ടുകളായി ഡി.എം.കെ.യും എ.ഐ.എ.ഡി.എം.കെയുമടക്കം ദ്രാവിഡ കക്ഷികളുടെ കൈയിലായിരുന്ന തമിഴ്നാടിന്റെ രാഷ്ട്രീയ ചരിത്രത്തിന് ഒരു വലിയ മാറ്റം സംഭവിച്ചിരിക്കുന്നു. നടൻ വിജയ് സ്ഥാപിച്ച ‘തമിഴക വെട്രി കഴകം’ (ടി.വി.കെ.) എന്ന പുതിയ പാർട്ടി നൂറിലധികം സീറ്റുകൾ നേടി സംസ്ഥാനത്തെ ഏറ്റവും വലിയ ഒറ്റക്കക്ഷിയായി ഉയർന്നിരിക്കുന്നു. ചെറുകക്ഷികളുടെ പിന്തുണയോടെ സംസ്ഥാനത്ത് സർക്കാരിനെ രൂപീകരിക്കാനുള്ള ശ്രമത്തിലാണ് ടി.വി.കെ. currently.
സിനിമയും രാഷ്ട്രീയവും ഇഴചേരുന്ന തമിഴ്നാട്ടിൽ, സിനിമാ താരങ്ങൾ രാഷ്ട്രീയത്തിലേക്ക് കടന്നുവരുന്നതിന്റെ ചരിത്രം പരിഗണിക്കുമ്പോൾ, വിജയ് മാത്രമാണ് മൂന്നാമത്തെ വെള്ളിത്തിര താരമായി രാഷ്ട്രീയത്തിലും തിളങ്ങാനും അധികാരം കൈയാളാനും സാധിച്ചത്. എം.ജി.ആറും ജയലളിതയും മാത്രമാണ് ഇതുവരെ ഈ നേട്ടം കൈവരിച്ചവർ. 2021-ലെ തിരഞ്ഞെടുപ്പിൽ 133 സീറ്റുകൾ നേടിയ ഡി.എം.കെ. ഇത്തവണ 59 സീറ്റിലേക്ക് ഒതുങ്ങി. മുഖ്യമന്ത്രി എം.കെ. സ്റ്റാലിന്റെ പരാജയമാണ് ഡി.എം.കെയ്ക്ക് ഏറ്റവും വലിയ ആഘാതം. തന്റെ രാഷ്ട്രീയ കോട്ടയായിരുന്ന കൊളത്തൂർ മണ്ഡലത്തിൽ ടി.വി.കെയുടെ സ്ഥാനാർത്ഥി വി.എസ്. ബാബുവിനോട് 8,795 വോട്ടുകൾക്ക് സ്റ്റാലിൻ പരാജയപ്പെട്ടു. സംസ്ഥാനത്ത് ഭരണത്തിലിരിക്കെ തിരഞ്ഞെടുപ്പിൽ പരാജയപ്പെടുന്ന മൂന്നാമത്തെ മുഖ്യമന്ത്രിയാണ് സ്റ്റാലിൻ. 1967-ൽ കോൺഗ്രസ്സ് മുഖ്യമന്ത്രിയായിരുന്ന എം. ഭക്തവത്സലവും 1989-ൽ എ.ഐ.എ.ഡി.എം.കെയുടെ മുഖ്യമന്ത്രിയായിരുന്ന ജയലളിതയും ഭരണത്തിലിരിക്കെ പരാജയപ്പെട്ടിരുന്നു.
നിരവധി ജനക്ഷേമ പദ്ധതികൾ നടപ്പാക്കുകയും, മതേതര രാഷ്ട്രീയത്തിന്റെ ശക്തനായ നേതാവായി ഉയരുകയും ചെയ്ത സ്റ്റാലിന്റെ പരാജയം രാഷ്ട്രീയ മേഖലയിൽ അമ്പരപ്പുളവാക്കിയിരിക്കുന്നു. ഒരു ഡസനോളം ഡി.എം.കെ. മന്ത്രിമാർ അടിപതറി ടി.വി.കെയുടെ മുന്നേറ്റത്തിൽ പരാജയപ്പെട്ടു. രാഷ്ട്രീയത്തിലെ പുതുമുഖങ്ങളോടാണ് പതിറ്റാണ്ടുകളുടെ രാഷ്ട്രീയ പാരമ്പര്യമുള്ള ഇവർ പരാജയപ്പെട്ടത്. ഭരണവിരുദ്ധ വികാരത്തിനപ്പുറം വിജയിന്റെ താരപ്രഭയും ടി.വി.കെയുടെ ചിട്ടയായ പ്രവർത്തനങ്ങളും ഡി.എം.കെയുടെ പരാജയത്തിനു കാരണമെന്നാണ് വിലയിരുത്തപ്പെടുന്നത്.
കൃത്യമായ സംഘടനാ സംവിധാനത്തിലൂടെ ജനകീയാടിത്തറ ബലപ്പെടുത്തിയതിനുശേഷമാണ് വിജയ് പ്രായോഗിക രാഷ്ട്രീയത്തിലേക്ക് പ്രവേശിക്കുന്നത്. തമിഴ്നാട്ടിലങ്ങോളമിങ്ങോളം സന്നദ്ധ, സേവന പ്രവർത്തനങ്ങൾ നടത്തിയിരുന്ന അനുയായികളുടെ കൂട്ടായ്മകളെയാണ് (രസികൻ മൺട്രം) അദ്ദേഹം രാഷ്ട്രീയ പാർട്ടിയുടെ അടിത്തറയാക്കി മാറ്റിയത്. തമിഴ്നാട്ടിലെ സ്ത്രീകളെയും യുവാക്കളെയും ലക്ഷ്യമിട്ട് ടി.വി.കെ. നടത്തിയ വാഗ്ദാനങ്ങളും പാർട്ടിയെ തുണച്ചു. സ്ത്രീകൾക്ക് പ്രതിമാസം 2,500 രൂപ ധനസഹായം, പ്രതിവർഷം ആറ് എൽ.പി.ജി. സിലിണ്ടറുകൾ, തൊഴിലില്ലാത്ത യുവാക്കൾക്ക് സാമ്പത്തിക സഹായം, കർഷകരുടെ വായ്പ എഴുതിത്തള്ളൽ, പെൺകുട്ടികളുടെ വിദ്യാഭ്യാസത്തിന് സാമ്പത്തിക സഹായം എന്നിവ പാർട്ടി പ്രകടനപത്രികയിൽ ഉൾപ്പെടുത്തിയിരുന്നു.
തിരഞ്ഞെടുപ്പുകളിൽ ജയപരാജയങ്ങളും ഭരണമാറ്റവും സ്വാഭാവികമാണെങ്കിലും, തമിഴ്നാട്ടിലെ ഇപ്പോഴത്തെ ഭരണമാറ്റം ഉയർത്തുന്ന ചില ആശങ്കകളും ഉണ്ട്. കേവല അധികാരമാറ്റത്തിനപ്പുറം ദ്രാവിഡ രാഷ്ട്രീയത്തിന്റെ ദിശയെ ഇതെങ്ങനെ ബാധിക്കുമെന്നതും, സവർണ്ണ-വർഗീയ രാഷ്ട്രീയത്തെ പ്രതിരോധിക്കുന്നതിൽ എം.കെ. സ്റ്റാലിനോളം ആർജവം കാണിക്കാന് വിജയിന് കഴിയുമോ എന്നതുമാണ് പ്രധാനമായും ഉയരുന്ന ചോദ്യങ്ങൾ.
Photo and News Source: Siraj Live
