തിരുവനന്തപുരം: സംസ്ഥാനത്ത് വിപണിയിലെത്തുന്ന മത്സ്യങ്ങളിൽ പലതും പഴക്കം തോന്നാത്തവയാണെങ്കിലും വെട്ടിയാലേ കേടെന്ന് മനസിലാകുന്നത്. കേരളത്തിലെ ഹാർബറുകളിൽ നിന്നെന്ന വ്യാജേന അന്യസംസ്ഥാനങ്ങളിൽ നിന്ന് ടൺ കണക്കിന് മത്സ്യം എത്തുന്നു. പഴകിയ മത്സ്യങ്ങൾക്ക് വില കുറഞ്ഞതിനാലാണ് ഇവയുടെ കുത്തൊഴുക്ക്. ആഴ്ചകളോളം പഴക്കമുള്ള മത്സ്യങ്ങൾ വരെ വില്പനയിലുണ്ട്.
മലയാളിയുടെ മത്സ്യ പ്രേമം ചൂഷണം ചെയ്യുന്ന അന്യസംസ്ഥാന ലോബി പ്രവർത്തിക്കുന്നത് കണ്ടെത്തിയിട്ടുണ്ട്. ഒരു കിലോ മീനിന് ഒരു കിലോ ഐസ് എന്ന തോതിലാണ് മത്സ്യം സൂക്ഷിക്കാൻ നിർദ്ദേശിക്കുന്നത്. എന്നാൽ മിക്ക കച്ചവടക്കാരും ഐസ് ഉപയോഗിക്കാറില്ല. ചൂട് കൂടുമ്പോൾ മത്സ്യം പെട്ടെന്ന് ചീയുന്നു. മാർക്കറ്റിൽ നിന്ന് വാങ്ങി വീട്ടിലെത്തുമ്പോൾ അവസ്ഥ വഷളാകുന്നു.
മാർക്കറ്റിൽ നിന്ന് വാങ്ങിയ മീൻ മുറിച്ചപ്പോൾ പുഴുക്കളെ കണ്ടെത്തിയ സംഭവങ്ങളും റിപ്പോർട്ടായിട്ടുണ്ട്. ചൂര പോലുള്ള മത്സ്യങ്ങളിൽ പരാന്നഭോജികളും കാണപ്പെടുന്നു. ഭക്ഷ്യസുരക്ഷാ വകുപ്പ് അധികൃതർ പരാതികൾ വ്യാപകമാണെന്ന് സൂചിപ്പിക്കുന്നു. പ്രദേശിക മാർക്കറ്റുകളിൽ ശീതികരണ സംവിധാനങ്ങൾ ഇല്ലാത്തത് പഴക്കത്തിന് പ്രധാന കാരണമാണ്. ഫോർമാലിൻ പോലുള്ള രാസവസ്തുക്കളും ഉപയോഗിക്കപ്പെടുന്നതായി സംശയിക്കുന്നു.
Photo and News Source: Sathyam Online
