ദുബൈ | അമേരിക്കയുടെ നാവിക ഉപരോധം തടസ്സമാക്കാതെ ഇറാൻ 46 ലക്ഷം ബാരൽ ക്രൂഡ് ഓയിൽ കയറ്റുമതി ചെയ്തതായി റിപ്പോർട്ടുകൾ. ഉപരോധത്തെ നിഷ്പ്രഭമാക്കി ഇറാൻ തങ്ങളുടെ ഊർജ്ജ വിപണി സജീവമായി നിലനിർത്തുന്നു.
കഴിഞ്ഞ ദിവസങ്ങളിൽ ഇറാന്റെ എക്സ്പോർട്ട് ടെർമിനലുകളിൽ നിന്നായി 46 ലക്ഷം ബാരൽ എണ്ണ കയറ്റിയതായി ടാങ്കർ ട്രാക്കർമാരും സാറ്റലൈറ്റ് ചിത്രങ്ങളും വ്യക്തമാക്കുന്നു. ഇതിന്റെ മൂല്യം ഏകദേശം 40 കോടി ഡോളറാണ്. ഉപരോധ നിയന്ത്രണങ്ങൾ മറികടക്കാൻ കപ്പലുകളുടെ ട്രാൻസ്പോണ്ടറുകൾ ഓഫ് ചെയ്ത് യാത്ര ചെയ്യുന്ന സറ്റെൽത്ത് ടാങ്കറുകളിലൂടെയാണ് ഈ നീക്കം.
ഹോർമുസ് കടലിടുക്കിന്റെ വടക്കൻ തീരത്തെ ഭൂമിശാസ്ത്ര പ്രത്യേകതകൾ ഇത്തരം നീക്കങ്ങൾക്ക് സഹായകരമാണ്. ഇത് ആഗോള വിപണിയിലെ എണ്ണ വിതരണ ആശങ്കകൾ കുറച്ചു. ഏപ്രിൽ 30 ഓടെ എണ്ണവില സർവ്വകാല റെക്കോർഡിലേക്ക് എത്താനുള്ള സാധ്യത 2 ശതമാനത്തിൽ നിന്ന് 1.1 ശതമാനമായി കുറഞ്ഞു. ഇറാനിയൻ എണ്ണ വിപണിയിലെ ആത്മവിശ്വാസമാണ് ഇതിന് കാരണം.
ഉപരോധം നീക്കിയാൽ ഹോർമുസ് കടലിടുക്കിലെ നിയന്ത്രണങ്ങളിൽ ഇളവ് വരുത്താമെന്ന് പാകിസ്ഥാൻ വഴി ഇറാൻ അമേരിക്കയെ അറിയിച്ചതായും റിപ്പോർട്ടുകൾ. എന്നാൽ ആണവ പദ്ധതിയടക്കമുള്ള കാര്യങ്ങളിൽ വിട്ടുവീഴ്ചയില്ലാതെ ഈ നിർദ്ദേശം അമേരിക്ക സ്വീകരിക്കാൻ സാധ്യതയില്ല. നിലവിലെ സാഹചര്യത്തിൽ എണ്ണ കിണറുകൾക്കോ അടിസ്ഥാന സൗകര്യങ്ങൾക്കോ നാശമുണ്ടായാൽ കടുത്ത തിരിച്ചടിയുണ്ടാകുമെന്ന് ഇറാൻ മുന്നറിയിപ്പ് നൽകിയിട്ടുണ്ട്.
Photo and News Source: Siraj Live
