യുഎഇയിൽ വേനൽച്ചൂട് കൂടുതൽ ശക്തമാകുമെന്ന് കാലാവസ്ഥാ വിദഗ്ധർ മുന്നറിയിപ്പ് നൽകുന്നു. വരുന്ന ദിവസങ്ങളിൽ രാജ്യത്തിന്റെ ഉൾപ്രദേശങ്ങളിൽ താപനില 43 ഡിഗ്രി സെൽഷ്യസ് വരെ ഉയരാനുള്ള സാധ്യതയുണ്ട്. തീരപ്രദേശങ്ങളിൽ അന്തരീക്ഷ ഈർപ്പം കൂടിയിരിക്കും.
മണിക്കൂറിൽ 40 കിലോമീറ്റർ വേഗതയിൽ വീശാവുന്ന കാറ്റ് പൊടിപടലങ്ങൾ ഉയർത്തി കാഴ്ച പരിധി കുറയ്ക്കും. അറേബ്യൻ ഗൾഫിലും ഒമാൻ കടലിലും കടൽ പ്രക്ഷുബ്ധമാകാനുള്ള സാധ്യതയുമുണ്ട്. കടലിൽ പോകുന്നവർ ജാഗ്രത പാലിക്കണമെന്ന് ദേശീയ കാലാവസ്ഥാ നിരീക്ഷണ കേന്ദ്രം നിർദ്ദേശിക്കുന്നു.
ബുധനാഴ്ച താപനില വീണ്ടും ഉയരുമെങ്കിലും വ്യാഴാഴ്ചയിൽ പടിഞ്ഞാറൻ മേഖലകളിൽ ചൂട് കുറയാനുള്ള സാധ്യതയുണ്ട്. വെള്ളിയാഴ്ച വരെ സമാന കാലാവസ്ഥ തുടരുമെന്ന് കാലാവസ്ഥാ വിദഗ്ധർ അറിയിക്കുന്നു. നിലവിലെ കാലാവസ്ഥയ്ക്ക് കിഴക്ക് നിന്നുള്ള ന്യൂനമർദ്ദവും പടിഞ്ഞാറ് നിന്നുള്ള ഉച്ചമർദ്ദവുമാണ് കാരണം.
Photo and News Source: Asianet News
