തെക്കുപടിഞ്ഞാറൻ കൊളംബിയയിലെ കാജിബിയോ മുനിസിപ്പാലിറ്റിയിൽ പനാമെറിക്കൻ ഹൈവേയിലൂടെ സഞ്ചരിച്ച ബസിൽ സ്ഫോടകവസ്തു പൊട്ടിത്തെറിച്ചു. ഈ ആക്രമണത്തിൽ 13 പേർ കൊല്ലപ്പെടുകയും, 38 പേർക്ക് പരിക്കേൽക്കുകയും ചെയ്തു. കൊല്ലപ്പെട്ടവരിൽ 5 കുട്ടികളും ഉൾപ്പെടുന്നു. ഭീകരപ്രവർത്തകരുടെ ആക്രമണമാണെന്ന് കൊളംബിയൻ സൈനിക മേധാവി ജനറൽ ഹ്യൂഗോ ലോപ്പസ് സ്ഥിരീകരിച്ചു.
FARC വിമത വിഭാഗമായ 'ജെയിം മാർട്ടിനെസ്' ഗ്രൂപ്പും അതിന്റെ നേതാവ് 'ഇവാൻ മോർഡിസ്കോ'യും ആക്രമണത്തിന് പിന്നിലാണെന്ന് അധികൃതർ വ്യക്തമാക്കുന്നു. 2016ലെ സമാധാന കരാർ ലംഘിച്ചവരാണിവർ. കഴിഞ്ഞ രണ്ട് ദിവസത്തിനുള്ളിൽ മേഖലയിൽ 26 അക്രമ സംഭവങ്ങൾ റിപ്പോർട്ട് ചെയ്യപ്പെട്ടിട്ടുണ്ട്. പൊലീസ് സ്റ്റേഷനുകൾ, റഡാർ സൗകര്യങ്ങൾ, സൈനിക യൂണിറ്റുകൾ എന്നിവയെ ലക്ഷ്യമാക്കിയുള്ള ആക്രമണങ്ങളാണ് ഇതിൽ ഉൾപ്പെടുന്നത്.
മയക്കുമരുന്ന് കടത്ത് മേഖലകളുടെ നിയന്ത്രണത്തിനായി സായുധ സംഘങ്ങൾ തമ്മിൽ നടക്കുന്ന മത്സരമാണ് അക്രമം വർദ്ധിക്കാൻ കാരണമെന്ന് അധികൃതർ അഭിപ്രായപ്പെടുന്നു. കൊളംബിയൻ പ്രസിഡന്റ് ഗുസ്താവോ പെട്രോ ഈ അക്രമത്തെ തീവ്രമായി അപലപിച്ചു. വിമത നേതാവ് 'മർലോൺ' ഉൾപ്പെടെയുള്ളവരെ പിടികൂടുന്നവർക്ക് സർക്കാർ വലിയ തുക പ്രതിഫലം പ്രഖ്യാപിച്ചു.
Photo and News Source: Sathyam Online
