യുഎഇ സർക്കാർ വിദേശകാര്യ മന്ത്രാലയത്തിന്റെ നേതൃത്വത്തിൽ ഡിജിറ്റൽ അറ്റസ്റ്റേഷൻ സേവനം ഏപ്രിൽ 27 മുതൽ പ്രാബല്യത്തിൽ വരുന്നു. പരമ്പരാഗത സങ്കീർണ നടപടിക്രമങ്ങൾ ഒഴിവാക്കി, ഉപഭോക്താക്കൾക്ക് രേഖകൾ വേഗത്തിലും സുരക്ഷിതമായും സാക്ഷ്യപ്പെടുത്താനാകും. ആധുനിക സാങ്കേതികവിദ്യ ഉപയോഗിച്ച് ഭരണനിർവ്വഹണം മെച്ചപ്പെടുത്താനുള്ള യുഎഇയുടെ ദീർഘവീക്ഷണമാണ് ഈ മാറ്റം.
വിദേശകാര്യ മന്ത്രാലയത്തിന്റെ ഈ നീക്കം രാജ്യത്തിന്റെ ഡിജിറ്റൽ പരിവർത്തനത്തിൽ ഒരു നാഴികക്കല്ലാണ്. ഉപഭോക്താക്കളുടെ അഭിപ്രായങ്ങളും നിർദ്ദേശങ്ങളും പരിഗണിച്ചാണ് ഈ സേവനം വികസിപ്പിച്ചിരിക്കുന്നത്. ഇലക്ട്രോണിക് രേഖകൾ സാക്ഷ്യപ്പെടുത്തുന്നതിനായി ഓഫീസുകൾ സന്ദർശിക്കേണ്ട ആവശ്യമില്ല. ക്യുആർ കോഡുകൾ, ബാർകോഡുകൾ, റഫറൻസ് നമ്പറുകൾ എന്നിവ ഉൾപ്പെടുത്തിയ ആധുനിക വെരിഫിക്കേഷൻ ഫീച്ചറുകൾ രേഖകളുടെ സുരക്ഷയും വിശ്വാസ്യതയും വർദ്ധിപ്പിക്കുന്നു.
വ്യാജ രേഖകൾ തടയാനും അന്താരാഷ്ട്ര തലത്തിൽ രേഖകളുടെ സാധുത ഉറപ്പാക്കാനും ഈ സംവിധാനം സഹായിക്കും. വിദേശകാര്യ മന്ത്രാലയത്തിന്റെ ഔദ്യോഗിക വെബ്സൈറ്റിലൂടെയോ സ്മാർട്ട് ആപ്ലിക്കേഷൻ വഴിയോ ഉപഭോക്താക്കൾക്ക് സേവനങ്ങൾ ലഭ്യമാകും. യുഎഇക്കുള്ളിലും വിദേശത്തുമുള്ള യുഎഇ മിഷനുകൾ വഴി രേഖകൾ സാക്ഷ്യപ്പെടുത്തേണ്ടവർക്കും ഈ ഡിജിറ്റൽ പ്ലാറ്റ്ഫോം പ്രയോജനകരമാണ്.
Photo and News Source: Kvartha
