ഇസ്ലാമാബാദ്: സമാധാന ചർച്ചയ്ക്കായി യു.എസ്. പ്രതിനിധികൾ എത്തുന്നതിന് മുമ്പ് പാകിസ്താൻ സന്ദർശനത്തിന് ശേഷം ഇറാൻ വിദേശകാര്യ മന്ത്രി അബ്ബാസ് അരാഗ്ചിയും സംഘവും ഒമാനിലേക്ക് പോയി. പിന്നീട് റഷ്യയിലേക്ക് പോകുന്നതിന് മുമ്പായി വീണ്ടും പാകിസ്താനിലേക്ക് തിരിച്ചെത്തുമെന്ന് ഇറാൻ ഔദ്യോഗിക വാർത്താ ഏജൻസി ഐആർഎൻഎ അറിയിച്ചു.
പ്രതിനിധി സംഘത്തിന്റെ ഒരു വിഭാഗം ടെഹ്റാനിലേക്ക് മടങ്ങി. യുദ്ധം അവസാനിപ്പിക്കുന്നതുമായി ബന്ധപ്പെട്ട വിഷയങ്ങളിൽ മാർഗനിർദ്ദേശം തേടിയാണ് അവർ പോയതെന്നും ഞായറാഴ്ച രാത്രി ഇവർ അരാഗ്ചിയോടൊപ്പം ചേരുമെന്നും വാർത്താ ഏജൻസി സൂചിപ്പിച്ചു.
യു.എസ്. പ്രതിനിധികളുടെ പാകിസ്താൻ സന്ദർശനം ഇറാൻ നേരിട്ട് ചർച്ചയ്ക്ക് തയ്യാറാകാത്തതിനെത്തുടർന്ന് ഡൊണാൾഡ് ട്രംപ് റദ്ദാക്കിയിരുന്നു. വെള്ളിയാഴ്ച അരാഗ്ചി പാകിസ്താനിലെത്തി, മധ്യസ്ഥരായ പാകിസ്താൻ നേതാക്കളുമായി കൂടിക്കാഴ്ച നടത്തി. വെടിനിർത്തൽ കാര്യത്തിൽ ഇറാന്റെ നിലപാട് അദ്ദേഹം വിശദീകരിച്ചു.
യു.എസ്. പ്രസിഡന്റിന്റെ പശ്ചിമേഷ്യാ ദൂതനും മരുമകനും അടങ്ങുന്ന സംഘം ശനിയാഴ്ച പാകിസ്താനിലെത്തുമെന്ന് വൈറ്റ് ഹൗസ് പ്രഖ്യാപിച്ചു. ഇറാന്റെ ആവശ്യപ്രകാരമാണ് ഈ യാത്രയെന്നും മാധ്യമ സെക്രട്ടറി കരോലിൻ ലീവിറ്റ് വ്യക്തമാക്കി.
Photo and News Source: Mathrubhumi
