മോസ്കോ: അമേരിക്കയുടെ വിദേശനയങ്ങളെയും സൈനിക ഇടപെടലുകളെയും റഷ്യൻ വിദേശകാര്യ മന്ത്രി സെർജി ലാവ്റോവ് കടുത്ത വിമർശനമുയർത്തി. ആഗോള ഊർജ്ജ വിപണിയിൽ തങ്ങളുടെ ആധിപത്യം ഉറപ്പിക്കാനാണ് യുഎസ് ശ്രമിക്കുന്നതെന്നും, വെനസ്വേല, ഇറാൻ തുടങ്ങിയ രാജ്യങ്ങളിലെ ഇടപെടലുകൾ അവിടുത്തെ എണ്ണ സമ്പത്ത് കൈക്കലാക്കാനാണെന്നും അദ്ദേഹം ആരോപിച്ചു. ‘ലോക ഊർജ്ജ വിപണിയിൽ തങ്ങളുടെ നിയന്ത്രണം വർദ്ധിപ്പിക്കാൻ യുഎസ് ഏതുവിധേനയും ശ്രമിക്കും’ എന്നദ്ദേഹം പറഞ്ഞു.
പ്രകൃതിവിഭവങ്ങളുള്ള രാജ്യങ്ങളിലെ ഭരണകൂടങ്ങളെ അട്ടിമറിക്കാനോ ഭരണാധികാരികളെ ഇല്ലാതാക്കാനോ പോലും അമേരിക്ക മടിക്കില്ലെന്നും ലാവ്റോവ് കുറ്റപ്പെടുത്തി. സ്വന്തം സാമ്പത്തിക താല്പര്യങ്ങൾ സംരക്ഷിക്കുന്നതിനായി അമേരിക്ക അധികാര രാഷ്ട്രീയം പ്രയോഗിക്കുന്നുവെന്നും അദ്ദേഹം ആരോപിച്ചു. റഷ്യൻ സ്റ്റേറ്റ് ടെലിവിഷന് നൽകിയ അഭിമുഖത്തിൽ സംസാരിക്കവെയാണ് ലാവ്റോവ് ഈ ആരോപണങ്ങൾ ഉയർത്തിയത്. ‘അമേരിക്ക സ്വന്തം ക്ഷേമത്തിൽ മാത്രം ശ്രദ്ധിക്കുന്നു’ എന്നദ്ദേഹം ചൂണ്ടിക്കാട്ടി. പ്രകൃതിവിഭവങ്ങളുള്ള രാജ്യങ്ങളിലെ ഭരണാധികാരികളെ ‘അട്ടിമറി, തട്ടിക്കൊണ്ടുപോകൽ, കൊലപാതകം’ എന്നിങ്ങനെ ഏത് മാർഗത്തിലൂടെയും ഒതുക്കി തങ്ങളുടെ താല്പര്യങ്ങൾ സംരക്ഷിക്കാൻ അവർ തയ്യാറാകുമെന്നും അദ്ദേഹം പറഞ്ഞു.
യുഎസ് ഇപ്പോൾ തങ്ങളുടെ ലക്ഷ്യങ്ങൾ മറച്ചുവെക്കുന്നില്ലെന്നും, ആഗോള ഊർജ വിപണിയിൽ ഒരു ‘ആധിപത്യ സിദ്ധാന്തം’ പിന്തുടരുകയാണെന്നും ലാവ്റോവ് ആരോപിച്ചു. പ്രധാന വിഭവങ്ങളുടെ നിയന്ത്രണം വിപുലീകരിക്കാൻ ശ്രമിക്കുന്നത് അന്താരാഷ്ട്ര നിയമങ്ങളെ തകർക്കുന്നുവെന്നും അദ്ദേഹം പറഞ്ഞു.
Photo and News Source: Mathrubhumi
