ന്യൂഡൽഹി: മുസ്ലീം സ്ത്രീകൾ പള്ളികളിൽ നിസ്കരിക്കുന്നതിനു പകരം വീട്ടിൽ പ്രാർത്ഥിക്കുന്ന രീതി പിന്തുടരുന്നതിന്റെ പിന്നിൽ പ്രായോഗിക കാരണങ്ങളാണെന്ന് സുപ്രീം കോടതി ജഡ്ജി ജസ്റ്റിസ് അഹ്സാനുദ്ദീൻ അമാനുള്ള അഭിപ്രായപ്പെട്ടു. ശബരിമല കേസുമായി ബന്ധപ്പെട്ട വിശ്വാസവും മൗലികാവകാശങ്ങളും ചർച്ച ചെയ്യുന്ന ഒമ്പതംഗ ബെഞ്ചിന് മുന്നിലായിരുന്നു അദ്ദേഹത്തിന്റെ നിരീക്ഷണം. പ്രവാചകന്റെ കാലം മുതൽ സ്ത്രീകൾക്ക് പള്ളിയിൽ പ്രവേശിക്കുന്നതിനോ നിസ്കരിക്കുന്നതിനോ നിയന്ത്രണമില്ലെന്നും പ്രാർത്ഥന രീതി സംബന്ധിച്ച് കൃത്യമായ ആചാരങ്ങൾ നിലനിൽക്കുന്നുവെന്നും അദ്ദേഹം വ്യക്തമാക്കി.
സ്ത്രീകൾ വീട്ടിൽ പ്രാർത്ഥിക്കുന്നതിനുള്ള പ്രധാന കാരണം കുടുംബ ഉത്തരവാദിത്തങ്ങളാണെന്ന് ജസ്റ്റിസ് അമാനുള്ള പറഞ്ഞു. കുടുംബത്തിലെ മുതിർന്നവർ പള്ളിയിൽ പോയാൽ കുട്ടികളെ ആര് നോക്കും എന്ന ചോദ്യം അദ്ദേഹം ഉന്നയിച്ചു. പള്ളികളിൽ സ്ത്രീകൾക്കായി പ്രത്യേക സ്ഥലം നിശ്ചയിക്കുന്നത് 1,200 വർഷമായി തുടരുന്ന ആചാരമാണെന്നും അദ്ദേഹം ചൂണ്ടിക്കാട്ടി.
വാദങ്ങൾ അവതരിപ്പിച്ച അഭിഭാഷകൻ എം.ആർ. ഷംഷാദ്, പള്ളികൾ ഇസ്ലാമിക വിശ്വാസത്തിന്റെ അവിഭാജ്യ ഘടകമാണെന്ന വാദഗതിയുമായി വിയോജിച്ചു. നിസ്കാരം തുറന്ന സ്ഥലത്തും നിർവഹിക്കാമെന്ന 1994-ലെ സുപ്രീം കോടതി വിധി തിരുത്തണമെന്നും അദ്ദേഹം ആവശ്യപ്പെട്ടു. പള്ളികളിൽ സ്ത്രീകൾക്ക് പ്രവേശന വിലക്കില്ലെന്നും മുൻനിര സ്ഥാനം നൽകണമെന്ന ഹർജിക്കാരുടെ ആവശ്യം ഖുറാനിൽ പറയുന്നില്ലെന്നും അദ്ദേഹം കോടതിയോട് വ്യക്തമാക്കി.
Photo and News Source: Janam TV
