ഇന്ധനവില വർധനവിലും തുച്ഛമായ വേതന നിരക്കിലും പ്രതിഷേധിച്ച് രാജ്യവ്യാപകമായി ഡെലിവറി ജീവനക്കാർ പണിമുടക്കിന് ആഹ്വാനം ചെയ്തു. ഗിഗ് ആൻഡ് പ്ലാറ്റ്ഫോം സർവീസസ് വർക്കേഴ്സ് യൂണിയന്റെ നേതൃത്വത്തിൽ നടക്കുന്ന പണിമുടക്ക് ഇന്ന് ഉച്ചയ്ക്ക് 12 മണി മുതൽ വൈകുന്നേരം 5 മണി വരെ നീണ്ടുനിൽക്കും. ഈ സമയങ്ങളിൽ ആപ്പ് അധിഷ്ഠിത ഡെലിവറി സേവനങ്ങൾ പൂർണ്ണമായും നിർത്തിവെക്കാനാണ് സംഘടനയുടെ തീരുമാനം.
പെട്രോൾ, ഡീസൽ വിലയിൽ ലിറ്ററിന് മൂന്ന് രൂപ വീതം വർധിപ്പിച്ചത് ഡെലിവറി ജീവനക്കാരുടെ വരുമാനത്തെ സാരമായി ബാധിച്ചിട്ടുണ്ട്. വർധിച്ചുവരുന്ന ഇന്ധനച്ചെലവ് മൂലം ഉപജീവനമാർഗ്ഗം കണ്ടെത്താൻ പ്രയാസമാണെന്ന് ജീവനക്കാർ ചൂണ്ടിക്കാട്ടുന്നു. പണിമുടക്കിന്റെ ഭാഗമായി എല്ലാ ആപ്പ് അധിഷ്ഠിത സേവനങ്ങളും നിർത്തിവെച്ച് പ്രതിഷേധത്തിൽ പങ്കുചേരണമെന്ന് യൂണിയൻ എക്സ് (ട്വിറ്റർ) പ്ലാറ്റ്ഫോമിലൂടെ ജീവനക്കാരോട് അഭ്യർത്ഥിച്ചു.
പശ്ചിമേഷ്യയിലെ സംഘർഷാവസ്ഥയെത്തുടർന്ന് ആഗോള വിപണിയിൽ ക്രൂഡ് ഓയിൽ വിലയിലുണ്ടായ കുതിപ്പാണ് ഇന്ത്യയിലെ ഇന്ധനവില വർധനവിന് കാരണമായത്. സംഘർഷത്തിന് മുൻപ് ബാരലിന് 70 ഡോളറായിരുന്ന ക്രൂഡ് ഓയിൽ വില ഇപ്പോൾ 105 ഡോളറിലേക്ക് ഉയർന്നിരിക്കുകയാണ്. ഈ സാഹചര്യത്തിൽ വില വർധിപ്പിക്കാതെ മുന്നോട്ട് പോകാൻ കഴിയില്ലെന്ന നിലപാടാണ് എണ്ണക്കമ്പനികൾ സ്വീകരിച്ചിരിക്കുന്നത്. ഇന്ധനവിലയിലെ ഈ വർധനവ് സാധാരണക്കാരുടെ ജീവിതച്ചെലവിനെയും വലിയ തോതിൽ ബാധിക്കുമെന്നാണ് വിലയിരുത്തപ്പെടുന്നത്.
Photo and News Source: Siraj Live
