തൃശ്ശൂർ മാതൃഭൂമി ബുക്സ്റ്റോറിൽ വെച്ച് 'ആർക്കും ആരുമല്ലാത്ത എല്ലാവർക്കും' എന്ന പുസ്തകം പ്രകാശനം ചെയ്തു. മാതൃഭൂമി ബുക്സ് പ്രസിദ്ധീകരിച്ച ഈ കൃതി, പരസ്യമേഖലയിൽ കോപ്പി റൈറ്ററായിരുന്ന ബ്രിട്ടൻ വാഴപ്പിള്ളി തന്റെ ജീവിതത്തിലെ വിഷാദത്തിലൂടെയുള്ള യാത്രയെയും അതിജീവനത്തെയും ആസ്പദമാക്കി എഴുതിയതാണ്. തൃശ്ശൂർ അതിരൂപതയിലെ 2011-ൽ പട്ടം ലഭിച്ച വൈദിക സുഹൃത്തുക്കൾ ചേർന്നാണ് പുസ്തകത്തിന്റെ പ്രകാശനം നിർവഹിച്ചത്. പുസ്തകത്തിന്റെ ആദ്യ കോപ്പി ബ്രിട്ടന്റെ പിതാവ് വി.വി. ദേവസ്സിക്കുട്ടി ഏറ്റുവാങ്ങി.
കമ്മ്യൂണിക്കേഷൻസ് പ്രൊഫഷണലായ ഹരി ഭഗീരത് പുസ്തകം പരിചയപ്പെടുത്തി. മനുഷ്യന്റെ മാനസിക സംഘർഷങ്ങൾ, തകർച്ചകൾ, വീണ്ടും ഉയിർത്തെഴുന്നേൽക്കാനുള്ള ശ്രമങ്ങൾ എന്നിവ അതീവ സത്യസന്ധമായി ഈ കൃതിയിൽ അവതരിപ്പിച്ചിട്ടുണ്ടെന്ന് അദ്ദേഹം അഭിപ്രായപ്പെട്ടു. ജീവിതത്തിൽ തനിച്ചായിപ്പോകുന്ന നിമിഷങ്ങളിൽ ഏതൊരു മനുഷ്യനും തേടുന്ന കൂട്ടാണ് ഈ പുസ്തകം സമ്മാനിക്കുന്നതെന്നും അദ്ദേഹം കൂട്ടിച്ചേർത്തു. വിഷാദം, ചെറുത്തുനിൽപ്പും മാറ്റങ്ങളും, ആത്മപരിശോധന, വിഷാദത്തിൽനിന്നുള്ള അറിവ്, ഉപസംഹാരം എന്നിങ്ങനെ അഞ്ചു ഭാഗങ്ങളിലായാണ് പുസ്തകം ക്രമീകരിച്ചിരിക്കുന്നത്.
ചടങ്ങിൽ റവ. ഫാ. ഏബിൾ ചിറമ്മേൽ, ഫാ. ഡോ. സിന്റോ പൊറത്തൂർ, റവ. ഫാ. ജസ്റ്റിൻ എലുവത്തിങ്കൽ, റവ. ഫാ. ജോൺ പോൾ ചെമ്മണ്ണൂർ, റവ. ഫാ. ഡിജോ ഒലക്കേങ്കിൽ, സിനോയ് പുതുക്കാടൻ എന്നിവർ ആശംസകൾ നേർന്നു. വിഷാദത്തെ അതിജീവിച്ച ഒരാളുടെ അനുഭവക്കുറിപ്പുകൾ എന്ന നിലയിൽ വായനക്കാർക്ക് വലിയ പ്രതീക്ഷ നൽകുന്ന ഒരു കൃതിയാണിത്.
Photo and News Source: Mathrubhumi
