പാമ്പുകടിയെതിരെ പ്രതിരോധവും സമയബന്ധിതമായ ചികിത്സയും പ്രധാനമാണെന്ന് ആരോഗ്യ മന്ത്രി വീണാ ജോർജ് വ്യക്തമാക്കി. ചൂട് കൂടിയതോടെ പാമ്പുകൾ തണുപ്പുള്ള പ്രദേശങ്ങൾ തേടുന്നതിനാൽ വീടുകളും സ്ഥാപനങ്ങളും പാമ്പുകൾ കയറിയിരിക്കാനുള്ള സാഹചര്യങ്ങൾ ഒഴിവാക്കണം. വീടുകളിലും പരിസരങ്ങളിലും പാമ്പുകൾ കയറാതിരിക്കാൻ വാതിലുകളും ജനലുകളും അടച്ചിടുക. വിടവുകൾ അടയ്ക്കുക. നിലത്ത് ഉറങ്ങാതെ കിടക്ക ഉപയോഗിക്കുക. വീടിനോട് ചേർന്ന് വിറക്, തൊണ്ട്, ചിരട്ട തുടങ്ങിയവയൊന്നും സൂക്ഷിക്കരുത്. പുല്ലും കുറ്റിച്ചെടികളും വെട്ടി വൃത്തിയായി സൂക്ഷിക്കുക.
എല്ലാ ആശുപത്രികളിലും പാമ്പുകടി ചികിത്സയ്ക്കുള്ള ആന്റി സ്നേക്ക് വെനം ലഭ്യമാണ്. രോഗലക്ഷണങ്ങളും ലാബ് പരിശോധനകളും അടിസ്ഥാനമാക്കി പ്രോട്ടോകോളിന്റെ അടിസ്ഥാനത്തിലാണ് വെനം നൽകുന്നത്. ആശുപത്രികൾ പ്രോട്ടോകോൾ പാലിച്ച് ചികിത്സ ഉറപ്പാക്കണമെന്ന് മന്ത്രി നിർദ്ദേശിച്ചു. വീട്ടിനുള്ളിൽ പാമ്പ് കടിക്കുന്ന സംഭവങ്ങൾ ആവർത്തിക്കാതിരിക്കാൻ പ്രത്യേക ജാഗ്രത പാലിക്കേണ്ടതുണ്ട്. കൊതുക് വല ഉപയോഗിക്കുന്നതും സുരക്ഷിതത്വം വർദ്ധിപ്പിക്കും. പാമ്പുകടി സംഭവങ്ങൾ തടയുന്നതിൽ ജനങ്ങളുടെ സഹകരണം അത്യാവശ്യമാണ്.
Photo and News Source: Kairali News
