ബിജെപിയും കാസയും ചേർന്ന് മുസ്ലിം ലീഗിനെ മുൻനിർത്തി ന്യൂനപക്ഷ സമൂഹത്തെ ലക്ഷ്യം വെച്ച് വർഗീയ പ്രചാരണങ്ങൾ അഴിച്ചുവിടുകയാണെന്ന് എസ്എഫ്ഐ സംസ്ഥാന പ്രസിഡന്റ് എം. ശിവപ്രസാദ് ആരോപിച്ചു. ഇത്തരം കുത്സിത ശ്രമങ്ങളെ തിരിച്ചറിയാനുള്ള രാഷ്ട്രീയ വിവേകം കേരളത്തിലെ ജനങ്ങൾക്കുണ്ടെന്ന് അദ്ദേഹം ഫേസ്ബുക്ക് കുറിപ്പിലൂടെ വ്യക്തമാക്കി.
കെ.സി. വേണുഗോപാലിനെ ഹൈക്കമാൻഡ് ഒഴിവാക്കിയത് ലീഗിന് വഴങ്ങിയാണെന്ന തരത്തിൽ നടക്കുന്ന പ്രചാരണങ്ങളെയും അദ്ദേഹം വിമർശിച്ചു. ആർഎസ്എസിന്റെയും ബിജെപിയുടെയും താൽപ്പര്യങ്ങൾ സംരക്ഷിക്കുന്നതിന് വേണ്ടിയാണ് കോൺഗ്രസ് കെ.സി. വേണുഗോപാലിനെ ഡൽഹിയിലും വി.ഡി. സതീശനെ കേരളത്തിലും നിലനിർത്തിയതെന്ന് അദ്ദേഹം അഭിപ്രായപ്പെട്ടു.
വർഗീയ പ്രചാരണങ്ങൾക്ക് വഴിമരുന്നിട്ടത് യുഡിഎഫ് ആണെന്ന് കുറ്റപ്പെടുത്തിയ ശിവപ്രസാദ്, ഇതിനെ ചെറുക്കേണ്ടത് കേരളത്തിന്റെ മൊത്തത്തിലുള്ള ഉത്തരവാദിത്തമാണെന്നും ഓർമ്മിപ്പിച്ചു. ബിജെപിയുടെ ഇത്തരം വിഭജന അജണ്ടകളെ ഒറ്റക്കെട്ടായി നേരിടണമെന്നും അദ്ദേഹം ആഹ്വാനം ചെയ്തു.
Photo and News Source: Sathyam Online
