ബഹിരാകാശ ദൗത്യങ്ങളെക്കുറിച്ച് ചിന്തിക്കുമ്പോൾ റോക്കറ്റുകളും സാങ്കേതികവിദ്യയുമാണ് നമ്മുടെ മനസ്സിൽ വരുന്നത്. എന്നാൽ ഇപ്പോൾ ലോകം ശ്രദ്ധിക്കുന്നത് ബഹിരാകാശ സഞ്ചാരികളുടെ ഭക്ഷണപ്പൊതിയാണ്. ചന്ദ്രനെ ചുറ്റി വരുന്ന ആർട്ടിമിസ്-2 ദൗത്യത്തിൽ 10 ദിവസത്തെ യാത്രയ്ക്കായി 189 വിഭവങ്ങളുള്ള വിസ്മയകരമായ മെനു തയ്യാറാക്കിയിരിക്കുന്നു. ഭൂമിയിലെ പോലെ അടുക്കളയില്ലാത്തതിനാൽ, ഫ്രീസ് ഡ്രൈഡ്, തെർമോ സ്റ്റെബിലൈസ്ഡ്, റെഡി-ടു-ഈറ്റ് എന്നീ മൂന്ന് തരത്തിലുള്ള ഭക്ഷണക്രമമാണ് നാസ ഉപയോഗിക്കുന്നത്.
ദൗത്യത്തിൽ ഭക്ഷണം എത്തിക്കാൻ സൗകര്യമില്ലാത്തതിനാൽ ഓരോ വിഭവവും കൃത്യമായ ആസൂത്രണത്തോടെ തയ്യാറാക്കിയിരിക്കുന്നു. മെനുവിലെ ഏറ്റവും ശ്രദ്ധേയമായ വിഭവം 58 ടോർട്ടില്ലകളാണ്. ബഹിരാകാശത്ത് ബ്രെഡ് ഒഴിവാക്കുന്നത് അതിന്റെ നുറുങ്ങുകൾ ഉപകരണങ്ങൾക്ക് അപകടകരമാകുന്നതിനാലാണ്. സഞ്ചാരികളുടെ മനോവീര്യം നിലനിർത്താൻ അവരുടെ ഇഷ്ടവിഭവങ്ങൾക്ക് മുൻഗണന നൽകിയിരിക്കുന്നു.
പ്രഭാതഭക്ഷണത്തിൽ വെജിറ്റബിൾ ക്വിച്ചെ, സോസേജ്, ബ്ലൂബെറി വിഭവങ്ങൾ; ഉച്ചയിലും രാത്രിയിലും ബാർബിക്യൂഡ് ബീഫ് ബ്രെസ്കറ്റ്, മാംഗോ സാലഡ്, മക്രോണി ആൻഡ് ചീസ്, ബ്രോക്കോളി വിഭവങ്ങൾ എന്നിവ ഉൾപ്പെടുന്നു. മൈക്രോഗ്രാവിറ്റിയിൽ രുചിയും മണവും കുറയുന്നതിനാൽ, അഞ്ച് തരത്തിലുള്ള എരിവ് സോസുകൾക്കും ഹോട്ട് സോസുകൾക്കും പ്രാധാന്യമുണ്ട്. കാപ്പി, ഗ്രീൻ ടീ, മാംഗോ-പീച്ച് സ്മൂത്തി, ലെമനേഡ്, ആപ്പിൾ സി എന്നിവയും മെനുവിൽ ഉൾപ്പെടുത്തിയിരിക്കുന്നു.
Photo and News Source: Media Mangalam
