ലണ്ടനിൽ നിന്നുള്ള വെളിപ്പെടുത്തലിൽ, ബ്രിട്ടനിലെ 12 പ്രമുഖ സർവ്വകലാശാലകൾ ഫലസ്തീൻ അനുകൂല വിദ്യാർത്ഥികളെയും അധ്യാപകരെയും നിരീക്ഷിക്കാൻ സ്വകാര്യ ഏജൻസിയെ നിയോഗിച്ചതായി പുറത്തുവന്നു. മുൻ സൈനിക ഇന്റലിജൻസ് ഉദ്യോഗസ്ഥർ നടത്തുന്ന ഹോറസ് സെക്യൂരിറ്റി കൺസൾട്ടൻസി ലിമിറ്റഡിനെയാണ് ഇവർ ലക്ഷക്കണക്കിന് പൗണ്ട് നൽകിയത്. 2022 മുതൽ 4.8 കോടി രൂപ വരെ ഈ കമ്പനിക്ക് സർവ്വകലാശാലകൾ നൽകിയതായി രേഖകൾ വ്യക്തമാക്കുന്നു.
സോഷ്യൽ മീഡിയ പോസ്റ്റുകളുടെ നിരീക്ഷണമാണ് പ്രധാന ലക്ഷ്യം. കാമ്പസുകളിൽ ഫലസ്തീൻ അനുകൂല പ്രതിഷേധങ്ങൾ നടത്തുന്ന വിദ്യാർത്ഥികളുടെ ഓൺലൈൻ പ്രവർത്തനങ്ങൾ ആർട്ടിഫിഷ്യൽ ഇന്റലിജൻസ് ഉപയോഗിച്ച് ശേഖരിക്കുകയും വിശകലനം ചെയ്യുകയും ചെയ്യുന്നു. ലണ്ടൻ സ്കൂൾ ഓഫ് ഇക്കണോമിക്സിലെ ഒരു പിഎച്ച്ഡി വിദ്യാർത്ഥിനിയുടെ എക്സ് പോസ്റ്റ് പോലുള്ളവ ഇതിൽ ഉൾപ്പെടുന്നു. 'ഞങ്ങളെ കുടിയൊഴിപ്പിച്ചിരിക്കാം, പക്ഷേ ഞങ്ങൾ ശക്തരും സംഘടിതരുമാണ്' എന്ന അവരുടെ കുറിപ്പ് ഹോറസ് കമ്പനിയുടെ റിപ്പോർട്ടിൽ ഉൾപ്പെടുത്തിയിട്ടുണ്ട്.
വിദ്യാർത്ഥികളുടെ ഓരോ നീക്കവും സർവ്വകലാശാലകൾക്ക് റിപ്പോർട്ടായി നൽകാൻ ഈ ഏജൻസി ഭീമമായ തുക ഈടാക്കുന്നു. ലക്ചർ പരമ്പരകളിൽ പങ്കെടുക്കുന്ന അതിഥികളെയും ഇവർ നിരീക്ഷിക്കുന്നതായി റിപ്പോർട്ടിൽ പറയുന്നു. അക്കാദമിക് വിദഗ്ധർക്കും ഭീഷണിയായി ഇതിനെ കാണുന്നവരുണ്ട്.
Photo and News Source: Kvartha
