തിരഞ്ഞെടുപ്പിൽ മത്സരിച്ചപ്പോൾ 35 ലക്ഷം രൂപ നഷ്ടപ്പെട്ടതായും, തന്നെ എംഎൽഎ ആക്കാമെന്ന് പറഞ്ഞ് പലരും പണം തട്ടിയെടുത്തതായും സോഷ്യൽ മീഡിയയിൽ പ്രചരിക്കുന്ന വാർത്തകൾക്കെതിരെ നടി അഞ്ജലി നായർ രംഗത്ത്. താൻ ഇത്തരത്തിൽ ഒരു പ്രസ്താവനയും നടത്തിയിട്ടില്ലെന്നും, പൂർണ്ണമായും അടിസ്ഥാനരഹിതമായ കാര്യങ്ങളാണ് പ്രചരിക്കുന്നതെന്നും താരം വ്യക്തമാക്കി.
താൻ രാഷ്ട്രീയത്തിലേക്ക് വരുന്നതിന് മുൻപ് പല സാഹചര്യങ്ങളിലായി മറ്റുള്ളവരെ സഹായിക്കാൻ ചെലവാക്കിയ തുകയാണ് 35 ലക്ഷം രൂപയെന്നും, അത് തിരഞ്ഞെടുപ്പ് ചെലവുമായി ബന്ധപ്പെട്ടതല്ലെന്നും അഞ്ജലി വിശദീകരിച്ചു. വോട്ട് കണക്കുകൾ ഉൾപ്പെടെ തെറ്റായ വിവരങ്ങൾ പ്രചരിപ്പിക്കുന്നവർ വസ്തുതകൾ മനസ്സിലാക്കി പ്രവർത്തിക്കണമെന്നും അവർ ആവശ്യപ്പെട്ടു. ഇത്തരം വ്യാജ വാർത്തകൾ നിർമ്മിക്കുന്നതിലൂടെ എന്ത് സന്തോഷമാണ് ലഭിക്കുന്നതെന്നും താരം ചോദിക്കുന്നു.
സിനിമയിൽ അവസരങ്ങൾ കുറഞ്ഞതുകൊണ്ടല്ല താൻ രാഷ്ട്രീയത്തിൽ ഇറങ്ങിയതെന്നും, കൃത്യമായ ആലോചനയ്ക്ക് ശേഷമാണ് ഈ തീരുമാനമെടുത്തതെന്നും അഞ്ജലി പറഞ്ഞു. തിരഞ്ഞെടുപ്പിൽ പരാജയപ്പെട്ടെങ്കിലും രാഷ്ട്രീയത്തിൽ നിന്ന് പിന്മാറാൻ ഉദ്ദേശിക്കുന്നില്ലെന്നും, സിനിമയും ബിസിനസും രാഷ്ട്രീയവും ഒരുമിച്ച് കൊണ്ടുപോകുമെന്നും അവർ വ്യക്തമാക്കി. തന്നെ പിന്തുണയ്ക്കുന്നവർക്ക് നന്ദി അറിയിച്ച താരം, അടിസ്ഥാനരഹിതമായ ആരോപണങ്ങൾക്കെതിരെ ഇനിയും പ്രതികരിക്കുമെന്നും കൂട്ടിച്ചേർത്തു.
Photo and News Source: Asianet News
