പഞ്ചാബിലെ ജലന്ധറിലും അമൃത്സറിലും ബി.എസ്.എഫ് താവളങ്ങൾക്ക് സമീപം നടന്ന ഇരട്ട സ്ഫോടനങ്ങൾ സംസ്ഥാനത്ത് വലിയ രാഷ്ട്രീയ വിവാദത്തിന് തിരികൊളുത്തിയിരിക്കുകയാണ്. സംഭവത്തെക്കുറിച്ച് മുഖ്യമന്ത്രി ഭഗവന്ത് മാനും സംസ്ഥാന പോലീസ് മേധാവിയും വിഭിന്നമായ അഭിപ്രായങ്ങൾ രേഖപ്പെടുത്തിയതോടെ വിഷയം ഗൗരവമേറിയ രാഷ്ട്രീയ ചർച്ചയായി മാറി. ഈ സ്ഫോടനങ്ങൾ വരാനിരിക്കുന്ന തിരഞ്ഞെടുപ്പിന് മുന്നോടിയായി ബിജെപി നടത്തുന്ന രാഷ്ട്രീയ ഗൂഢാലോചനയുടെ ഭാഗമാണെന്ന് മുഖ്യമന്ത്രി ആരോപിച്ചു. ബിജെപി മത്സരിക്കാൻ ആഗ്രഹിക്കുന്ന ഇടങ്ങളിലെല്ലാം ഇത്തരം സംഭവങ്ങൾ ഉണ്ടാകുന്നുണ്ടെന്നും അദ്ദേഹം പറഞ്ഞു. ബംഗാളിലെ വിജയത്തിന് പിന്നാലെ ബിജെപി പങ്കുവെച്ച 'നെക്സ്റ്റ് പഞ്ചാബ്' എന്ന ട്വീറ്റിനെ ഇതിന്റെ തെളിവായി അദ്ദേഹം ചൂണ്ടിക്കാട്ടി.
മുഖ്യമന്ത്രിയുടെ രാഷ്ട്രീയ ആരോപണങ്ങളെ തള്ളിക്കളയുന്നതായിരുന്നു ഡിജിപി ഗൗരവ് യാദവിന്റെ പ്രസ്താവന. പഞ്ചാബ് അസ്വസ്ഥമാണെന്ന തെറ്റായ ധാരണ പരത്താൻ പാകിസ്താൻ ഐഎസ്ഐ നടത്തുന്ന നീക്കമാണിതെന്ന് അദ്ദേഹം വ്യക്തമാക്കി. ഖലിസ്ഥാൻ ലിബറേഷൻ ആർമിയുടെ അവകാശവാദങ്ങൾ പോലീസ് പരിശോധിച്ച് വരികയാണ്. വിദേശ സഹായത്തോടെ സംസ്ഥാനത്ത് കുഴപ്പങ്ങൾ സൃഷ്ടിക്കാൻ ചിലർ ശ്രമിക്കുന്നുണ്ടെന്നും ഡിജിപി പറഞ്ഞു.
ജലന്ധറിലെ ബിഎസ്എഫ് ചൗക്കിൽ പാർക്ക് ചെയ്തിരുന്ന സ്കൂട്ടറിലാണ് ആദ്യ സ്ഫോടനം നടന്നത്. തിരക്കേറിയ സ്ഥലത്ത് നടന്ന ഈ സ്ഫോടനത്തിന് തൊട്ടുപിന്നാലെ സ്കൂട്ടറിന് തീപിടിച്ചത് പ്രദേശവാസികൾക്കിടയിൽ വലിയ പരിഭ്രാന്തി സൃഷ്ടിച്ചു. സിസിടിവി ദൃശ്യങ്ങളിൽ സ്ഫോടനം നടന്നയുടൻ ഒരാൾ ഓടിപ്പോകുന്നത് കാണാം. നിലവിൽ രണ്ടുപേരെ പോലീസ് ചോദ്യം ചെയ്തുവരികയാണ്. ജലന്ധറിലെ സംഭവത്തിന് മണിക്കൂറുകൾക്ക് ശേഷം അമൃത്സറിലെ ഖാസ പ്രദേശത്തുള്ള സൈനിക ക്യാമ്പിന് പുറത്ത് രണ്ടാമത്തെ സ്ഫോടനം റിപ്പോർട്ട് ചെയ്തത്. അതിർത്തിയിൽ നിന്ന് ഏകദേശം 15 കിലോമീറ്റർ മാത്രം അകലെയുള്ള ഈ സ്ഥലത്ത് ബൈക്കിലെത്തിയവർ ഗ്രനേഡ് എറിയുകയായിരുന്നുവെന്നാണ് പ്രാഥമിക നിഗമനം. രണ്ട് സ്ഫോടനങ്ങളിലും ഐഇഡി ആണ് ഉപയോഗിച്ചതെന്ന് പോലീസ് സ്ഥിരീകരിച്ചിട്ടുണ്ട്.
മുഖ്യമന്ത്രിയുടെ പ്രസ്താവനക്കെതിരെ ബിജെപി ശക്തമായ പ്രതിഷേധവുമായി രംഗത്തെത്തിയിട്ടുണ്ട്. ഭഗവന്ത് മാനിന്റെ മാനസികാവസ്ഥ ശരിയല്ലെന്നും അദ്ദേഹം രാജിവെച്ച് ചികിത്സ തേടണമെന്നും ബിജെപി നേതാവ് അശ്വനി ശർമ്മ വിമർശിച്ചു. ബിജെപിയെ മാത്രമല്ല, കോൺഗ്രസിനെയും മുഖ്യമന്ത്രിയുടെ പ്രസ്താവന പ്രകോപിപ്പിച്ചിട്ടുണ്ട്. കുറ്റകൃത്യങ്ങളിൽ ബിജെപിയെ പഴിക്കുന്നത് പക്വതയില്ലാത്ത രാഷ്ട്രീയമാണെന്ന് കോൺഗ്രസ് എം.പി സുഖ്ജിന്ദർ സിങ് രൺധാവ് പറഞ്ഞു.
നിലവിൽ പഞ്ചാബ് പോലീസ്, കേന്ദ്ര ഏജൻസികൾ എന്നിവ സംയുക്തമായി സ്ഫോടനത്തെക്കുറിച്ച് അന്വേഷണം നടത്തിവരികയാണ്. ഫോറൻസിക് സംഘങ്ങൾ സ്ഫോടനം നടന്ന സ്ഥലങ്ങളിൽ നിന്ന് തെളിവുകൾ ശേഖരിച്ചു. സംസ്ഥാനത്തുടനീളം സുരക്ഷ കർശനമാക്കിയിട്ടുണ്ട്. സ്ഫോടനത്തിന് പിന്നിലെ യഥാർത്ഥ പ്രതികളെയും അവരുടെ ലക്ഷ്യങ്ങളെയും കണ്ടെത്താനുള്ള ഊർജിതമായ ശ്രമത്തിലാണ് അന്വേഷണ ഉദ്യോഗസ്ഥർ.
Photo and News Source: Mathrubhumi
