ശരീരത്തിലെ രക്തം ശുദ്ധീകരിക്കുകയും മാലിന്യങ്ങളെ പുറന്തള്ളുകയും ചെയ്യുന്ന പ്രധാനപ്പെട്ട ജോലിയാണ് വൃക്കകൾ നിർവഹിക്കുന്നത്. വൃക്കകളുടെ പ്രവർത്തനം തകരാറിലാകുമ്പോൾ ആരോഗ്യത്തിൽ ഗുരുതരമായ പ്രത്യാഘാതങ്ങൾ ഉണ്ടാകാം. ഈ തകരാറുകളുടെ പ്രാരംഭ ലക്ഷണങ്ങൾ തിരിച്ചറിയാൻ കഴിയാതെ പോയാൽ, രോഗം കൂടുതൽ വഷളാകാനുള്ള സാധ്യതയുണ്ട്. വിദഗ്ദ്ധർ കണ്ണുകളിലൂടെ വൃക്കകളുടെ പ്രവർത്തന ശേഷി വിലയിരുത്താൻ കഴിയുമെന്ന് സൂചിപ്പിക്കുന്നു. കണ്ണിന് താഴെ തുടർച്ചയായി വീക്കം ഉണ്ടാകുക, മങ്ങിയതോ ചുവന്നതോ ആയ കണ്ണുകൾ, വരണ്ട കണ്ണുകൾ, കാഴ്ചയിലെ മാറ്റങ്ങൾ എന്നിവ വൃക്ക പ്രശ്നങ്ങളുടെ ലക്ഷണങ്ങളാകാം.
ഉറക്കം ഉണർന്ന ശേഷം കണ്ണുകളിൽ വീക്കം ഉണ്ടാകുന്നത് സാധാരണമാണ്. എന്നാൽ ഉറക്കത്തിന്റെ ക്ഷീണം വിട്ട ശേഷവും കണ്ണുകൾ വീര്യത്തോടെ തുടരുന്നത് വൃക്ക തകരാറിന്റെ സൂചനയാകാം. വൃക്കകൾക്ക് കേടുപാടുകൾ സംഭവിക്കുമ്പോൾ, മൂത്രത്തിലേക്ക് പ്രോട്ടീൻ ഒഴുകുന്ന അവസ്ഥയായ പ്രോട്ടീനൂറിയ ഉണ്ടാകുന്നു. ഈ അവസ്ഥ മൂലം കണ്ണുകളുടെ ചുറ്റുമുള്ള മൃദുവായ കലകളിൽ ദ്രാവകം അടിഞ്ഞുകൂടുന്നു. ഇത്തരം ലക്ഷണങ്ങൾ ശ്രദ്ധയിൽ പെട്ടാൽ, അവയെ നിസാരമാക്കാതെ ഉടൻതന്നെ ആരോഗ്യ വിദഗ്ദ്ധരെ സമീപിക്കേണ്ടത് അത്യാവശ്യമാണ്.
കാഴ്ച മങ്ങുകയോ വസ്തുക്കളെ രണ്ടായി കാണുകയോ ചെയ്യുന്നത് റെറ്റിനയിലെ രക്തക്കുഴലുകളുടെ തകരാറുമൂലമാകാം. ഉയർന്ന രക്തസമ്മർദവും പ്രമേഹവും വൃക്കരോഗങ്ങളിലേക്ക് നയിക്കുകയും, റെറ്റിനയിലെ രക്തക്കുഴലുകളെ തകരാറിലാക്കുകയും ചെയ്യും. വൃക്കരോഗമുള്ളവരിലോ ഡയാലിസിസിന് വിധേയരാകുന്നവരിലോ, വരണ്ട കണ്ണുകൾ സാധാരണമാണ്. എന്നാൽ സ്ഥിരമായ വരണ്ടതോ ചെറിച്ചിലുള്ളതോ ആയ കണ്ണുകൾ കാൽസ്യം, ഫോസ്ഫേറ്റ് തുടങ്ങിയ ധാതുക്കളുടെ അസന്തുലിതാവസ്ഥയോ, കണ്ണുനീർ ഉൽപാദനത്തെയും ലൂബ്രിക്കേഷനെയും ബാധിക്കുന്ന മാലിന്യങ്ങളുടെ അടിയേറ്റമോ ആയിരിക്കാം. ഇത്തരം സാഹചര്യങ്ങളിൽ കൃത്യമായ രോഗനിർണയം നടത്തേണ്ടത് അത്യാവശ്യമാണ്.
വൃക്കകളെ ബാധിക്കുന്ന ലൂപ്പസ് നെഫ്രൈറ്റിസ് പോലുള്ള ഓട്ടോഇമ്മ്യൂൺ അവസ്ഥകൾ കണ്ണുകളിൽ വീക്കം ഉണ്ടാക്കാം. ഇത് കണ്ണുകൾ ചുവന്ന നിറത്തിൽ കാണപ്പെടുന്നതിന് കാരണമാകുന്നു. സന്ധി വേദന, നീർവീക്കം, ചർമത്തിലെ തിണർപ്പ് എന്നിവയോടൊപ്പം കണ്ണിന് ചുവപ്പ് അനുഭവപ്പെടുകയാണെങ്കിൽ ഉടൻതന്നെ ഡോക്ടറെ കാണേണ്ടത് പ്രധാനമാണ്. ചില നിറങ്ങൾ തിരിച്ചറിയുന്നതിൽ ബുദ്ധിമുട്ട് ഉണ്ടാകുന്നവർക്ക്, പ്രത്യേകിച്ച് മഞ്ഞയും നീലയും, വൃക്ക തകരാറിന്റെ ലക്ഷണമാകാം. ഇത് ഒപ്റ്റിക് നാഡിക്ക് സംഭവിക്കുന്ന കേടുപാടുകൾ മൂലമോ റെറ്റിനയിലെ മാറ്റങ്ങൾ മൂലമോ ആകാം. ഈ വ്യത്യാസങ്ങൾ സാവധാനത്തിൽ പ്രത്യക്ഷപ്പെടുന്നതിനാൽ, പലപ്പോഴും അവയെ നിസാരമാക്കാറുണ്ട്.
Photo and News Source: Samakalika Malayalam
